BITEKO APONGEZA UTUNZANI WA VYANZO VYA MAJI WILAYANI MAKETE

Tarehe Iliyowekwa: February 22nd, 2024

Naibu Waziri Mkuu wa Jamhuri ya Muungano wa Tanzania, ambaye pia  ni Waziri wa Nishati,  Mhe. Dotto Biteko amewapongeza wananchi wa Wilaya ya Makete, mkoani Njombe kwa utunzaji wa mazingira na vyanzo vya maji, ambavyo vimepelekea mto Lumakali kuendelea kutiririsha maji ya kutosha.

Mh. Biteko amesema hayo leo Februari 22, 2024,  akiwa Wilayani Makete, wakati ametembelea eneo ambalo litajengwa  Bwana la Kufua umeme, katika Kijiji cha Madihani, Kata ya Kipagalo, na kwamba  Rais  Dkt. Samia Suluhu Hassan,  amekusudia kwa dhati kutekeleza mradi huo wa uzalishaji Umeme kutokana na umuhimu wake kwa Taifa.

Aidha, Mhe. Niteko amesema kuwa mradi huo  wa umeme wa Lumakali utachukua zaidi ya miezi 60 hadi kukamilika kwake, ambapo utaenda kuongeza  megawati zaidi ya 200 katika gridi ya Taifa na kupunguza kabisa shida ya upungufu wa nishati hiyo.

Sambamba na hayo, Naibu Waziri Mkuu Biteko,  amesema usanifu wa mwisho  umekamilika mwaka 2022, ambapo  tayari utekelezaji umeanza, huku akimpongeza mbunge wa Jimbo la Makete Mh.Festo Sanga kwa kuendelea kuusemea bungeni mradi huo wa Umeme.

Naye, Mkuu wa Mkoa wa Njombe, Mh. Antony Mtaka amesema kuwa,  serikali  inatekeleza miradi mingi ikiwemo huo wa umeme,  hivyo wananchi waendelee kuiunga mkono Serikali ya Rais Dkt. Samia Suluhu Hassan, na kuwasihi wazazi kuwapeleka watoto shule kwakuwa Mhe. Samia amewekeza katika elimu, ambayo ndio Urithi pekee wa Mtoto.

Kwa upande wake Mkuu wa Wilaya ya Makete, Mhe. Juma S. Sweda ameishukuru serikali kwa kuanza kutekeleza mradi huo, kwani unafaida kubwa kwa wananchi ikiwemo upatikanaji wa umeme wa uhakika, sambamba na kutengeneza ajira kwa wananchi wa maeneo hayo.

Hata hivyo, Mbunge wa Jimbo la Makete Mhe. Festo Sanga amesema kufika kwa Waziri Biteko kunaendelea  kunawapa matumaini ya utekelezaji wa mradi huo, na  kuishukuru  serikali kupitia shirika la umeme Tanzania, (TANESCO), kwa kuanza kutathmini gharama ya fidia.

Ikumbukwe kuwa, Naibu Waziri Mkuu, na Waziri wa Nishati, Mhe. Doto Biteko, Leo Februari 22, 2024, ameendelea na ziara ya Ukaguzi wa Miradi mkoani Iringa.

ReplyForward Add reaction