DC KISSA, CHANJO YA IPV 2 NA ROTA NI SALAMA NA BORA ZAIDI KWA AFYA YA MTOTO.

Tarehe Iliyowekwa: April 16th, 2025

Mkuu wa Wilaya ya Makete, Mhe. Kissa Gwakisa Kasongwa, leo Aprili 16, 2025, ametoa wito kwa wazazi na walezi wa watoto wenye umri chini ya Miaka mitano Wilayani humo, kuhakikisha kuwa wanapeleka watoto wao kupata chanjo ya Pili ya IPV 2 na Rota.

Mhe. Gwakisa ametoa rai hiyo, wakati akizindua Chanjo ya Nyongeza ya IPV2 na Rota,  katika Ukumbi wa Bomani, na kubainisha kuwa chanjo hiyo itaanza rasmi Mei 1 hadi Mei 4,2025, na kuendelea kutolewa kama kawaida kwenye vituo vya kutolea huduma za chanjo.

“Chanjo ya Rota inalenga kuzia ugonjwa wa Kuhara unaosababishwa na virusi vya Rota, ambao ni vyanzo vikuu vya vifo kwa watoto chini ya miaka mitano, chanjo hii tunalenga kupunguza vifo vya watoto na kuhakikisha kuwa wana afya njema ili waweze kukua na kuwa na mchango kwa taifa letu pendwa” alisema Mhe. Kissa

Aidha, Mhe. Kissa, amewahakikishia wananchi kuwa chanjo hizo ni salama na bora, hivyo amewasihi kutobabaishwa au kuyumbishwa na taarifa zisizo sahihi ambazo zitawapelekea kutowapa chanjo hiyo watoto wadogo.

Kwa upande wake Mratibu wa Chanjo Wilaya ya Makete, Ndg. Omar Khamis Omar, akiwasilisha umuhimu wa Chanjo hiyo kwa watoto, amesema kuwa chanjo hizo ni muhimu ili kuhakikisha kuwa watoto hawapati ulemavu au kupoteza maisha kutokana na ugonjwa wa Polio.

Ikumbukwe kuwa, Wilaya ya Makete, kwa ujumla imefikia asilimia 89% kwa utolewaji wa chanjo zote zinazotolewa kwa watoto na aslimia 86% kwa chanjo ya sindano dozi ya kwanza ya IPV 1.