DC SWEDA ATIMIZA AHADI YA MSAADA KWA FAMILIA ILIYOMTELEKEZA MTOTO KISA DENI LA MILIONI 2.

Tarehe Iliyowekwa: August 27th, 2024

Mkuu wa wilaya ya makete Mhe. Juma Sweda, leo Agosti 27, 2024 amefanikisha kulipa deni la shilingi milioni mbili kwa Bw. Oscar Mahenge aliyekuwa akiidai familia ya Bw. Chaula kutoka katika kijiji cha Ugabwa kata ya Lupalilo.

Akizungumza mara baada ya kukabidhi Fedha hizo, Mhe. Sweda, amewataka mdai na mdaiwa kuhakikisha kuwa wanasameheana na kuendelea na biashara zao kama kawaida.

Aidha, Mhe. Sweda, akiwa mbele ya viongozi hao wa Kijiji, amesema kuwa mama wa binti aliyeacha shule ili awatunze wadogo zake, atakabidhiwa shilingi milioni mbili, huku milioni moja imsaidie katika biashara yake na milioni moja itahifadhiwa benki.

Kwa upande wao, baadhi ya viongozi wa kijiji hicho akiwemo Mwenyekiti wa kijiji cha Ugabwa Ndg. Obadia Sanga, wamemshukuru Mkuu wa Wilaya kwa jambo kubwa alilolifanya kwenye familia hiyo.

Ikumbukwe kuwa, baba wa Familia hiyo, aliondoka nyumbani hapo baada ya kutofautiana na mke wake, ndipo mama huyo aka hukua uamuzi wa kuondoka kwa Madai ya kukimbia deni la shilingi milioni 2 lililodaiwa kusababishwa na mtoto wake wa kiume.

Sambamba na hayo ,Mkuu huyo wa Wilaya ya Makete, katika ziara hiyo aliambatana na Afisa elimu Sekondari, Afisa Ustawi wa jamii Wilaya ambapo kwa pamoja wamefika katika makazi ya familia ya binti huyo, aliyelazimika kuacha shule ili awatunze wadogo zake na kukutana na viongozi wa eneo hilo pamoja na baadhi ya wananchi

Hata hivyo, binti huyo tayari alisharudi shule ili kuendelea na masomo yake katika Shule ya Sekondari Ilumaki, iliyopo katika Kata ya Lupalilo, Wilaya ya Makete, Mkoani Njombe