DED MAKETE ASITISHA TOZO YA KIBALI CHA UVUNAJI WA MISITIU BINAFSI

Tarehe Iliyowekwa: June 20th, 2024

Mkurugenzi Mtendaji wa Halmashauri ya Wilaya ya Makete, Ndg. Wiliam Makufwe, amesitisha tozo ya kibali cha uvunaji wa misitu binafsi ya kupandwa mpaka pale utaratibu mzuri wa namna gani ya kutekeleza sheria hiyo utakaporekebishwa.

Ndg. Makufwe, amesema hayo leo Juni 20, 2024, akiwa kwenye kikao na wadau wa sekta ya Misitu ambao ni wakulima wa miti, wafanyabishara na wasafirishaji wa mazao ya Misitu, kuwa amesitisha mpaka pale watakapopata maoni na ushauri kupitia vikao ili kupata maamuzi ya pamoja.

Aidha Ndg. Makufwe, amewataka wadau hao kushirikiana katika kupambana na janga la moto, kwakuwa wanaelekea Kipindi cha kiangazi, hivyo kila mmoja atoe taarifa na elimu kwa jamii, ambapo Serikali imeendelea kuweka mikakati kwa uchomaji wa misitu.

"Mwaka 2023 zaidi ya hekari 3000 za miti ziliungua zenye jumla ya thamani Bilioni 4, ambazo ni athari kubwa kwa wakulima ivo kila mmoja awe balozi wa kukemea na kuzuia janga la moto Wilayani Makete" Alisema Makufwe.

Sambamba na hayo, Mkurugenzi Mtendaji wa Halmashauri ya Wilaya ya Makete, Ndg. Makufwe, amesema kuwa mazimio ya kikao cha wadau wa misitu ndio yaliyopelekea kusitisha tozo hiyo na kuongeza kua mageti ya ukaguzi yataendelea ili kujiridhisha idadi ya mbao zinazosafirishwa huku akiwaasa wafanyabishara kuwa waaminifu.

Aidha, Ndg. Makufwe amesema, kila baada ya miezi sita kutakua na kikao cha wafanyabishara wa mazao ya misitu na wakulima wa miti ili kujadiliana changamoto zinazowakabili kwa lengo ni kuijenga Halmashauri pamoja na kujengeana Uelewa wa umuhimu wa kulipa Ushuru.

Kwa Upande wao wadau wa zao hilo akiwemo, Ndg. Faromeo Mahenge ,Alten Sanga na Hongera Mahenge wamepongeza hatua ya Mkurugenzi kuwaita kwenye kikao kwani wamejadili kwa pamoja na kutoka na maazimio ambayo ni madhubuti na kuahidi kushirikiana nae ili kukuza na kuindeleza halmashauri kimapato.

Ikumbukwe kuwa, hapo awali kibali cha uvunaji wa misitu binafsi ya kupandwa iliwekwaa Tsh 100000/= kwa magari madogo, ambapo kiasi cha Tsh 150000/= kuliweka kwa magari Makubwa kama vile Semi trailer ambapo kwa sasa imesitishwa.