DED MAKUFWE ATOA NENO KWA WATUMISHI WAPYA WILAYANI MAKETE

Tarehe Iliyowekwa: September 24th, 2024

Mkurugenzi mtendaji wa Halmashauri ya wilaya ya Makete, Ndg. William M. Makufwe, amewataka watumishi wapya ambao ni watendaji wa vijiji kuhakikisha kuwa wanatimiza wajibu wao wa kiutendaji kwa kutatua changamoto za wananchi na kuhakikisha kuwa wanakusanya mapato ili serikali iweze kuendesha shughuli za kimaendeleo.

Ndg. Makufwe, amesema hayo leo Septemba 24,2024, wakati akizungumza na watumishi hao wapya, katika ukumbi wa Mikutano uliopo Bomani, makao makuu ya Halmashauri ya wilaya ya Makete, na kuwataka kujiepusha na migogoro isiyoyalazima mahala pa kazi.

“katimizeni wajibu wenu, kuweni waadilifu kama kanuni za utumishi wa umma zinavyotaka, fanya kazi kwa bidii, hakuna mafanikio yanakuja bila kujituma, Serikali imewaamini ndio maana imewapa kazi, hivyo basi hakikisha haupotezi kazi” Alisema Makufwe.

Aidha, Makufwe, amewataka watendaji hao wa vijiji kuhakikisha kuwa wanatunza siri za serikali ikiwa ni pamoja na kushirikiana na watumishi wengine ambao atakutana nao kwenye majukumu yao ya kila siku ili kuhakikisha serikali inatimiza majukumu yake kwa wananchi.

Sambamba na hayo, amewataka kuhakikisha kuwa wanajisajili kwenye mfumo wa Upimaji wa Utendaji kazi kwa watumishi wa umma, PEPMIS kwakuwa kwakutofanya hivyo, watajiondoa kwenye utumishi wa umma.

Naye, Mkuu wa Idara ya Utumishi wa Halmashauri ya Wilaya ya Makete, Ndg. Humphrey Mushi, amewataka watumishi hao kutokuwa wanaharakati kwasababu kuna namna bora ya kudai stahiki zao za kiutumishi, hivyo wasiende kuwa kikwazo kwa watumishi wengine.

Kwa Upande wake, Mkuu wa Kitengo cha Manunuzi na Ugavi, wa Halmashauri ya Wilaya ya Makete, Ndg. Mathias Mbafu, amewataka watumishi hao kuhakikisha kuwa wanajisajili kwenye mfumo wa NeST ili waweze kufanya manunuzi ya umma, kwasababu ni kosa kisheria kufanya manunuzi nje ya mfumo.

Ikumbukwe kuwa serikali ya Jamhuri ya Muungano wa Tanzania, hivi karibuni alitoa kibali cha kuajili watumishi wapya kwa Halmashauri ya Wilaya ya Makete, ambapo watendaji wa vijiji 12 wameajiliwa katika awamu hii.

Imeandaliwa na,

Kitengo cha Mawasiliano ya Serikali,

Halmashari ya Wilaya ya Makete.