DED MAKUFWE AWATAKA VIONGOZI WAPYA WA VIJIJI NA VITONGOJI KUTENDA HAKI

Tarehe Iliyowekwa: November 28th, 2024

Msimamizi wa Uchaguzi Wilaya ya Makete, Ndg. William M. Makufwe, amewataka viongozi wapya ngazi ya Vijiji na Vitongoji kuhakikisha kuwa wanatenda haki katika utekelezaji wa majukumu yao, mara baada ya kuaminiwa na wananchi kupitia Uchaguzi wa Serikali za Mitaa, ambao umefanyika Novemba,27,2024. 

Ndg. Makufwe, amesema hayo, leo Novemba 28, 2024, wakati wa zoezi la kuapishwa kwa Viongozi hao wa Vijiji na Vitongozi, kwenye ukumbi wa FEMA uliopo kata ya Tandala, Wilayani Makete, ambapo amebainisha kuwa uongozi ni dhamani hivyo kila kiongozi awajibike kwa nafasi yake.

“usikae na jambo ambalo umaona lipo juu ya uwezo wako, au unaona kabisa huwezi kulitatua, kwasabu ninyi mpo chini ya watu ambao ni Mkuu wa Wilaya, Mtendaji wa Kata, Mtendaji wa Kijiji, Mkurugenzi mtendaji wa Wilaya na wengineo hivyo mkiona mnashindwa kutatua changamoto zenu shirikisheni uongozi wa juu” alisema Makufwe.

Aidha, Ndg. Makufwe, amewataka wenyeviti hao wa Vijiji na Vitongozi, kuhakikisha kuwa hawafanyi vibaya kwenye uongozi wao, kwakuwa kwa kufanya hivyo watakuwa wanaipaka matope Serikali ya Jamhuri ya Muungano wa Tanzania, inayoongozwa na Mhe. Dkt. Samia Suluhu Hassan.

Ikumbukwe kuwa, Serikali ya Jamhuri ya Muungano wa Tanzanaia kupitia, Wizara ya Ofisi ya Nchi – TAMISEMI imesimamia uchaguzi wa Serikali za Mitaa, ambao umefanyika Novemba 27,2024, ambapo kwa Wilaya ya Makete, nafazi za Uenyekiti wa Vijiji 93, pamoja na Vitongoji 442 ziligombewa sambamba na Uundwaji wa Halmashauri za Vijiji kupitia kura za kundi mchanganyiko pamoja na Viti Maalumu  wanawake.