DED MWAGA AWATAKA WASIMAMIZI WA MIRADI KUUELEWA VIZURI MFUMO WA NeST

Tarehe Iliyowekwa: March 17th, 2025

Mkurugenzi Mtendaji wa Halmashauri ya Wilaya ya Makete, Ndg. Jerry Daimon Mwaga, leo Machi 17.2025, amewataka wasimamizi wote wa miradi ya Serikali inayotekelezwa katika Halmashauri hiyo, kuhakikisha kuwa wanatumia mfumo mpya wa Manunuzi wa NeST ili kurahihisha utekelezaji wa miradi hiyo.

Ndg. Mwaga amesema hayo, wakati akifungua mafunzo ya Kujengana Uelewa wa namna Mfumo mpya wa manunuzi kwa ummma NeST unavyofanya kazi, ambayo yanafanyika kwa siku mbili katika Ukumbi wa Shule ya Sekondari Iwawa, na kuratibiwa na Mamlaka ya Usimamizi wa Manunuzi ya Umma,PPRA, Kanda ya Mbeya.

“Hakikisheni mnaelewa mfumo huu ambao unatumika na Serikali katika kufanya manunuzi yote, kwasababu nyinyi ndio wasimamizi wa miradi na mnafanya manunuzi ya vifaa kila mara, hivyo kuweni wadadisi, msipoelewa uliza swali ili kila mtu anapotoka hapa awe na uelewa mkubwa katika matumizi ya mfumo wa NeST”, Alisema Ndg. Mwaga.

Kwa Upande wake, Afisa Manunuzi wa Halmashauri ya Wilaya ya Makete, Ndg. Mathias Mbafu, amesema kuwa, lengo la mafunzo hayo ni kuwajengea uwezo wasimamizi wa taasisi pamoja na wale wanaosimamia manunuzi kwa kila taasisi ili kusiwepo na changamoto ya kufanya manunuzi kupitia mfumo wa NeST.

Ikumbukwe kuwa Serikali kupitia Mamlaka ya Usimamizi wa Manunuzi ya Umma, PPRA, imeanzisha mfumo mpya wa manunuzi kwa Umma NeST, ili kuboresha manunuzi ya umma pamoja na kuongeza ufanisi wa upatikanaji wa wazabuni wa utekelezaji wa miradi mbalimbali ya serikali hapa nchini.