DED MWAGA AWATAKA WASIMAMIZI WA MIRADI YENYE FEDHA KUKAMILIKA KWA WAKATI

Tarehe Iliyowekwa: June 5th, 2025

Mkurugenzi Mtendaji wa Halmashauri ya Wilaya ya Makete, Ndg. Jerry Daimon Mwaga, ameagiza kuwa miradi yote viporo ambayo imepewa fedha za utekelezaji kwa mwaka huu wa Fedha iwe imekamilika ifikapo Juni 15,2025, kutokana na umuhimu wa miradi hiyo katika jamii.

Ndg. Mwaga, amesema hayo leo Juni 5,2025, wakati akizungumza na kamati mbalimbali za usimamizi wa miradi kwenye maeneo tofauti ambayo ni kata ya Kigala, Ikuwo, Mlondwe na Kinyika, mara baada ya kutembelea na kagua utekelezaji wa miradi hiyo ambayo fedha zake zilishafika kwa ajili ya utekelezaji.

“Niwaombe ifikapo Juni 15,2025, natazamia kuona mabadiliko katika miradi hii, haiwezekani fedha zimefika muda mrefu lakini bado mnasuasua, hii miradi ina umuhimu kwa jamii ndio maana Mama yetu Mhe. Dkt. Samia Suluhu Hassam ameleta fedha hizi ili wananchi wasipate shida ya kupata elimu au huduma za afya karibu na maeneo yao wanayoishi” alisema Ndg. Jerry Mwaga.

Aidha, Ndg.Mwaga, amewataka watendaji wa Kata na Vijiji kushinda kwenye utekelezaji wa miradi kwakuwa kukamilika kwake ndio mafanikio ya watu wote, kutokana na uhitaji wake katika jamii, kwakuwa lengo la serikali ni kutatua changamoto za wananchi.

Sambamba na hayo, Ndg. Mwaga ameagiza kutoa taarifa ya changamoto ambazo wanapitia kwenye utekelezaji wake ili ziweze kutatuliwa kwa haraka, na wananchi waweze kunufaika na serikali inayoongozwa na Rais Dkt. Samia Suluhu Hassan.

Ikumbukwe kuwa, Mkurugenzi Mtandaji wa Halmashauri ya Wilaya ya Makete, Ndg. Jerry Daimon Mwaga, leo Juni 5,2025, amehitimisha ziara ya Ukaguzi wa Miradi, kwa kutembelea na kukagua utekelezaji wake katika Kata ya Mfumbi, Kigala, Ikuwo, Mlondwe pamoja na Kinyika.