HALMASHAURI YA WILAYA YA MAKETE KUNUFAIKA NA MRADI WA KUBORESHA USALAMA WA MILIKI ZA ARDHI.

Tarehe Iliyowekwa: December 7th, 2023

Serikali ya Jamhuri ya Muungano wa Tanzania, kupitia Wizara ya Ardhi Nyumba na Maendeleo ya Makazi, imepanga kuboresha Usalama wa Milki, katika halmashauri ya Wilaya ya Mkaete, kupita mradi wa LTIP, unaofadhiliwa na Benki ya Dunia.

Akizungumza katika kikao cha Wakuu wa Idara na Vitengo, Afisa Mipango Miji Mwandamizi, kutoka Wizara ya Ardhi, Nyumba na Maendeleo ya Makazi Ndg. Enock E. Kyando, amesema kuwa, lengo la mradi huo ni Kupanga, Kupima, na kuandaa haki miliki za kimila katika maeneo ya vijiji, yenye matumizi ya mashama na makazi.

Aidha, Ndg. Kyando, amesema kuwa, kazi hiyo itafanyika kwa siku 90, kuanzia tarehe 11/12/2023 hadi 11/3/2024, katika vijiji 29, ambavyo vimependekezwa na wataalam, kutokana na vijiji hivyo kutokuwa na mipango ya matumizi ya ardhi.

Kwa upande wa Mkurugenzi Mtendaji wa Halmashauri ya Wilaya ya Makete, Ndg. William M. Makufwe, amesema kuwa mradi huo ni mkombozi mkubwa kwa wananchi ambao wamekuwa na ardhi isiyokuwa na thamani, kutokana na kutokuwa na hati miliki za Kimila, ambazo zingeweza kumwezesha kupata mikopo pamoja na kuondosha migogoro ya ardhi baina yao.

Nao baadhi ya wakuu wa Idara na Vitengo, akiwemo Mkuu wa Kitengo cha Fedha na Uhasibu Ndg. Seben Mwalutamwa, ameishukuru serikali kwa kuwapelekea mradi huo ambao utaenda kuwa mwarobaini katika utatuzi wa migogoro ya ardhi, ambayo imekuwa ikiisumbua wilaya ya Makete kwa mda mrefu.

Ikumbukwe kuwa, vijiji vitakavyofaidika na mradi huo mkubwa, ni pamoja na Makwaranga, Misiwa, Luvulunge, Ivalalila, Iwawa, Ludiani, Ndulamo, Maleutsi, Ruaha, Mfumbi, Kimani, Ikovo, Usalimwani, Tandala, Ikonda,Makangalawe, Ilindiwe, Ibaga, Usungilo pamoja na Igolwa.

Imeandaliwa na:

Kitengo cha Mawasiliano Serikalini, 

Halmashauri ya Wilaya ya Makete.