KAMATI YA LISHE YAKUTANA KUJADILI TAARIFA YA UTEKELEZAJI SHUGHULI ZA LISHE MAKETE

Tarehe Iliyowekwa: May 19th, 2023

Kikao cha Kamati ya Lishe robo ya Tatu ngazi ya Wilaya kimefanyika leo Mei 19, 2023 kwa lengo la kujadili utekelezaji wa shughuli za Lishe Wilaya ya Makete kwa kipindi cha Januari hadi Machi 2023.

Katika Kikao hicho wajumbe wa Kamati hiyo wamejadili taarifa za Divisheni ya Maendeleo ya Jamii, Elimu ya Awali, Msingi pamoja na Sekondari na Divisheni ya Afya Ustawi wa Jamii na Lishe, Divisheni ya Mifugo mifugo na Uvuvi.

Akiwa katika kikao hicho Mganga Mkuu wa Halmashauri ya Wilaya ya Makete Ligobert Kalisa amesema hali ya Lishe katika Wilaya ya Makete ni nzuri na ameongeza kuwa msisitizo wa Afya ya Lishe kwa watoto ni muhimu kuzingatiwa na Wazazi pamoja na Jamii kwa ujumla.

Afisa Lishe Wilaya ya Makete Bi. Jackline Nanauka amesema mikakati mtambuka inayoendelea kutekelezwa katika mapambano dhidi ya utapiamlo katika Halmashauri  ni pamoja na kutoa Elimu ya Afya na Lishe kwa wajawazito, kuhusu ulaji unaofaa wakati wa ujauzito na wakati wa kunyonyesha na ulishaji wa watoto wachanga

Pia maadhimisho ya siku za Afya na Lishe ya Kijiji angalau mara moja kila robo kwa kila kijiji, kutoa Elimu kwa Jamii juu ya umuhimu wa Matumizi ya maji safi na salama na usafi wa Mazingira.

Kwa upande wake Afisa Elimu Baptista Kaguo amesema katika jitihada za kuongeza upatikanaji wa vyakula vya Lishe kwenye shule za Msingi na Sekondari wamepanga kuanza Kilimo cha mbogamboga katika shule zote ili kuhakikisha wanafunzi wanapata Lishe bora kuanzia shuleni mpaka nyumbani.