MAPATO NDIO MHIMILI WA HALMASHAURI - MHE. FUNGO

Tarehe Iliyowekwa: May 10th, 2024

Mwenyekiti wa Halmashauri ya Wilaya ya Makete, Mhe. Christopher Yonam Fungo, amewataka madiwani wa Halmashauri hiyo, kuhakikisha kuwa wanasimamia vizuri ukusanyaji wa mapato pamoja na utekelezaji wa miradi ya maendeleo katika kata zao.

Mhe. Fungo amesema hayo kwenye kikao cha Pili cha Baraza la Madiwani, ambacho kimefanyika leo Mei, 10,2024, katika Ukumbi wa Bomani, kikiwa na lengo la kupokea na kujadili taarifa mbalimbali za Kamati za Kudumu za Halmashauri ya wilaya ya hiyo, katika Robo ya Tatu ya mwaka wa fedha wa 2023/2024.

Aidha, Mhe. Fungo, ameishukuru serikali ya Jamhuri ya Muungano wa Tanzania inayoongozwa na Mhe. Dkt. Samia Suluhu Hassan, kwa kuipatia Halmashauri hiyo, gari la kubebea wagonjwa (ambulance) ambalo litaenda kuhudumu katika kata ya Lupila.

Kwa Upande wake, Kaimu Mkurugenzi wa Halmashauri ya Wilaya ya Makete, Ndg. Albert Msemo, amewaomba madiwani kuendelea kutoa elimu kwa wananchi juu ya uuzaji wa Ngano kwa mzabuni ambaye ni Kampuni ya Bakhresa Group.

Sambamba na hayo, Ndg. Msemo, amewaomba madiwani kushiriki kakamilifu katika mbio za Mwenge wa Uhuru, ambazo June 18,2024, zinategemewa kukimbizwa wilayani humo, na mkesha kufanyika katika Kata ya Mfumbi.

Naye, Mwenyekiti wa Chama cha Mapinduzi, Ndg. Clemence Mwawite Ngajilo, amelishukuru Baraza la Madiwani, pamoja na Menejimenti kwa ujumla kwa utekelezaji mzuri wa Ilani ya CCM wilayani humo.

Hata hivyo, Mkuu wa Idara ya Kilimo, Ndg. Aniceth Ndunguru, akitoa ufafanuzi katika kikao hicho cha baraza la Madiwani, amewataka wananchi kuwa na amani kwakuwa mnunuzi wa Ngano ambaye ni Kampuni ya Bakhresa Group anafanya malipo baada ya siku tatu mzigo kufika kiwandani jijini Dar es Salaam.

Imeandaliwa na:

Kitengo cha Mawasiliano Serikalini,

Halmashauri ya Wilaya ya Makete.