MKUU WA MKOA

Tarehe Iliyowekwa: May 13th, 2022

Mkuu wa Mkoa wa Njombe amewataka watumishi wa Umma Halmashauri ya Wilaya ya Makete kufanya kazi kwa weledi, haki pasipo kuwa na hofu wakati wa utekelezaji wa majukumu yao ya kila siku.

Akizungumza na watumishi waliopo Makao makuu ya Wilaya ya Makete kwenye ukumbi wa Halmashauri, Mh. Waziri Kindamba Waziri amesema utumishi wa Umma uliotukuka ni ule unaozingatia Sheria, Taratibu na Kanuni wakati wote wa utekelezaji wa majukumu ya Serikali.

“Asije mtu akakutishia kukufukuza kazi pale unapofuata sheria, taratibu na kanuni, niwasihi watumishi msiogope hayo fanyeni kazi kwa misingi inayokubalika na Serikali

Lakini pia Makete ni Wilaya ya kazi hivyo tuendelee kuwahimiza wananchi kufanya kazi kwa bidii pamoja na ninyi watumishi muwe wabunifu ili kujiongezea kipato kwa kujishughulisha na shughuli mbalimbali zikiwemo shughuli za Kilimo mfano, Ngano, parachichi, Vanilla, Mahindi na mazao mengine ili muweze kupata fedha na kukuza uchumi binafsi na Halmashauri kwa ujumla” aliongeza Mh. Kindamba.

Wakati huohuo aliwahimiza watumishi hao kusimamia zoezi la uwekaji wa nguzo pamoja na vibao kwenye nyumba na taasisi za umma na binafsi ili liweze kukamilika ifikapo tarehe 15/05/2022.

Kwa upande wake Mkuu wa Wilaya ya Makete Mh. Juma Sweda amemshukuru Mkuu wa Mkoa kufika Makete na kuzungumza na watumishi ambao ni wasaidizi muhimu katika majukumu ya Serikali ngazi ya Wilaya mpaka ngazi za vijiji.

Mkurugenzi Mtendaji Wilaya ya Makete Ndg. William Makufwe amesema hadi kufikia mwezi Aprili, 2022 Wilaya ya Makete imekusanya mapato zaidi ya 130% vilevile Halmashauri imejiwekea mikakati mingine ya kuongeza vyanzo vya mapato ikiwemo ujenzi wa yadi ya Mbao Kata ya Mang’oto pamoja na stendi ya Mabasi Kimani iliyopo Kata ya Mfumbi.