MKUU WA WILAYA YA MAKETE MHE. SWEDA, AWATAKA WATENDAJI KUSIMAMIA MIKAKATI YA UPAMBANAJI NA UDUMAVU

Tarehe Iliyowekwa: March 4th, 2024

Mkuu wa wilaya ya Makete, Mhe. Juma Samwel Sweda, amewataka watendaji wa kata za Halmashauri ya wilaya hiyo kuhakikisha kuwa kila mwananchi anakuwa na bustani ya mbogamboga, kuku wa nyama na mayai, sambamba na upandaji wa miti ya matunda ili kupambana na udumavu.

Mhe. Sweda amesema hayo leo Machi 4,2024, wakati wa kikao cha Tathmini ya Lishe ngazi ya Jamii, ambacho kimefanyika katika ukumbi wa Bomani, uliopo Halmashauri ya Wilaya ya Makete.

“nyinyi ndio wakurugenzi wa kata zenu, haiwezekani ukawa na watoto wenye utapiamlo wakati mna kila rasirimali kwenye maeneo yenu, hakikisheni mtashirikiana na wadau kuhakikisha taasisi za elimu zinakuwa na ng’ombe wa maziwa, kuku sambambana na bustani za mboga mboga” alisema Mhe, Sweda.

Aidha, Mhe. Sweda amesema kuwa, mtoto anatakiwa kutunzwa tangu akiwa tumboni kwa mama yake, hivyo basi kila mzazi na mlezi awe na jukumu la kuhakikisha anapata chakula bora ili mtoto aweze kukua vizuri tangu tumboni kwa mama yake.

Naye, Mwenyekiti wa Halmashauri ya Wilaya ya Makete, Mhe. Christopher Y. Fungo, amewataka watendaji hao wa kata kusimamia vizuri ukusanyaji wa mapato, kutokana na umuhimu wake katika kupambana na udumavu wilayani Makete.

Kwa upande wake, Mganga Mkuu wa Wilaya ya Makete, Ndg. Ligobert Kalisa, amesema tathimini hiyo imelenga kujua changamoto na utatuzi wake, sambamba na kuweka mikakati ya upambanaji wa utapiamlo na udumavu wilayani humo kutokana na umuhimu wa ukuaji wa mtoto kiafya.

Akiwasilisha taarifa kwa Mkuu wa Wilaya, Kaimu Afisa Lishe wa Wilaya ya Makete, Bi. Agnes Kolumbani, amesema kuwa hadi sasa wilaya hiyo imebaini watoto 2484 wenye udumavu sawa na asilimia 32%, watoto 204 wenye ukondefu, na watoto 418 wenye uzito pungufu.

Imeandaliwa na:

Kitengo cha Mawasiliano Serikalini,

Halmashauri ya Wilaya ya Makete.