PANDENI BUSTANI ZA MBOGA MBOGA KUPAMBANA NA UDUMAVU - DC SWEDA

Tarehe Iliyowekwa: December 7th, 2023

Mkuu wa wilaya ya Makete, Mhe. Juma Sweda, amewaasa wazazi wa wanafunzi wanaosoma Shule ya Sekondari ya Ukwama kuzingatia Lishe bora kwa watoto wao kwa kupanda bustani ya mboga mboga kwenye vitaru vya Shule hiyo.

Mhe. Sweda , amesema hayo leo wakati akizungumza na wananchi wa Ukwama, baada ya kukagua mradi wa bweni la wasichana katika Shule ya Sekondari Ukwama, iliyopo katika kijiji cha Ukwama, Kata ya Ukwama kitongoji cha Lopate, kuwa Udumavu haukubaliki, hivyo kila mwananchi ahakikishe mtoto anapata mlo kamili wenye kuzingatia makundi yote ya chakula.

Ikumbukwe kuwa mradi huo wa Ujenzi wa Bweni la Wasichana utagharimu shilingi milioni 150, pesa kutoka TASAF, ikiwa ni pamoja na nguvu kazi za wananchi.

Aidha Mhe. Sweda ameungana na wananchi wa kijiji hicho katika maendeleo ya kutengeneza barabara, inayotoka kijiji cha Masisiwe, Ukwama hadi Kihanga kwa kutumia nguvu za wananchi. 

Hata hivyo, Mhe. Juma Sweda, kabla ya kufanya ukaguzi huo, ametembelea mradi wa Ujenzi wa madarasa ya kidato cha tano na sita, katika shule ya sekondari ya Lupalilo iliyoko katika kata ya Tandala Kijiji cha Ikonda, mradi huo utagharimu kiasi cha shilingi milioni 415, ikiwa ni vyumba vya madarasa 15 na matundu ya vyoo 20, Fedha zote ni kutoka serikali kuu, pamoja na ujenzi wa bwalo liltakalogharimu kiasi cha shilingi milioni 175, Fedha kutoka TASSAF.