RUWASA MAKETE KUHAKIKISHA UPATIKANAJI WA MAJI KWA WANANCHI WOTE

Tarehe Iliyowekwa: November 6th, 2022

Meneja wa Wakala wa maji safi na usafi wa Mazingira Vijijini (RUWASA) Wilaya ya Makete Mhandisi Innocent Lyamuya amesema wamejipanga kuhakikisha wananchi Wilayani Makete wanapata maji kwa zaidi ya 90%.

Amesema hayo mwishoni mwa wiki hii Novemba, 2022 wakati akiwasilisha taarifa ya hali ya upatikanaji wa maji vijijini na namna walivyojipanga kukabiliana na uhaba wa maji katika maeneo yenye changamoto hiyo ikiwemo Kata ya Tandala, Luwumbu, Mlondwe, Bulongwa , Mang’oto, Ukwama, Mbalache na maeneo mengine.

KUTAZAMA VIDEO BONYEZA HAPA

Mhandisi Lyamuya amesema Serikali kupitia Wakala wake RUWASA kwa kipindi cha mwaka wa fedha 2022/2023 imejipanga kuhakikisha mpaka kufikia mwaka 2025 wananchi wake wawe wanapata maji kwa 85% vijijini na mijini 95% hivyo kufanikiwa kwa kiasi kikubwa kukabiliana na uhaba wa maji kwa wananchi.

Ameongeza kuwa mpaka kufikia sasa Wananchi wa Wilaya ya Makete zaidi ya 90% wanapata huduma ya maji safi na Salama na matarajio ni kufikisha huduma ya maji kwa wananchi zaidi ya 95%.

Pia amempongeza Mheshimiwa Rais Samia Suluhu Hassan, Wizara ya Maji ikiongozwa na Waziri wa Maji Mhe. Jumaa Aweso na Katibu Mkuu wa Wizara hiyo Mhandisi Anthony Sanga na Mheshimiwa Mbunge Festo Sanga kwa kazi kubwa wanayoifanya katika kuhakikisha wananchi wa Makete wanapata huduma ya Maji bila usumbufu wa kufuata huduma hiyo umbali mrefu.