SHIRIKA LA MIICO LAZINDUA MRADI WA KUSAIDIA WAKULIMA NA WAFUGAJI WILAYANI MAKETE

Tarehe Iliyowekwa: July 3rd, 2021

Na Omega Thobias, Makete DC

Shirika lisilo la kiserikali la MIICO limezindua mradi mpya wenye malengo ya kuwasaidia wakulima na wafugaji kuweza kunufaika zaidi kupitia kurasikisha ardhi zao na kuzikatia hati miliki ili kuongeza thamani ya ardhi hizo.

Mkurugenzi Mtendaji wa Shirika la MIICO Bi. Catherine Mulaga ameiomba Halmashauri ya Wilaya ya Makete kushirikiana nao kikamilifu ili mradi wao watakaoutekeleza kwa muda wa miaka 3 uwe na tija kwa wananchi huku akisema kwasasa watautekeleza mradi kwenye Kata za Ipepo na Lupalilo kwani awali walitekeleza mradi kama huo kwenye Kata za Mbalatse na Mfumbi.

Awali, Mratibu wa mradi huo Bi. Gloria Mdindile amesema ili kufanikisha malengo mahususi ya mradi wataunda majukwaa ya ardhi ya Vijiji na kila jukwaa litakuwa na wajumbe 30 huku 15 kati yao ni lazima wawe wanawake. Pia, ametanabaisha kuwa watakuwa wakitoa hamasa kwa jamii kuhusu masuala yote yanayohusu ardhi, kuwajengea wananchi uelewa kuhusu usimamizi na utawala wa ardhi.

"Wilaya ya Makete tunawashukuru Shirika la MIICO kwani sio mara ya kwanza kufanya miradi inayohamasisha jamii kuhusu kilimo na umuhimu wa ardhi, Serikali tutawapa ushirikiano mkubwa na kupitia Idara ya ardhi na sheria tunaamini malengo ya mradi yatafikiwa ipasavyo. Nitoe wito kwa wananchi watakaofikiwa na mradi huu kuweza kuuchangamkia ili kuleta maendeleo yao na maendeleo ya serikali" alisema Mkurugenzi Mtendaji wa Halmashauri ya Wilaya ya Makete Bw. Francis Namaumbo. 

#MaketeMojaTuijengePamoja