VIONGOZI WA TALGWU WAKUTANA NA MKURUGENZI MTENDAJI (W) MAKETE

Tarehe Iliyowekwa: July 2nd, 2021

Viongozi wa Chama cha Wafanyakazi wa Serikali za Mitaa Tanzania (TALGWU) wa Wilaya ya Makete kwa uwakilishi wa matawi 8 ya TALGWU yaliyopo ndani ya Wilaya ya Makete wakiongozwa na Katibu wa TALGWU Mkoa wa Njombe Ndg. Raymond Chimbuya na Mjumbe wa Mkutano Mkuu wa TALGWU (Mwenyekiti mpya wa TALGWU Mkoa wa Njombe) Ndg. Festo Mbakilwa wamefanya mazungumzo na Mkurugenzi Mtendaji wa Halmashauri ya Wilaya ya Makete Ndg Francis Namaumbo.

Viongozi hao wamemshukuru DED Namaumbo kwa niaba ya Uongozi wa Wilaya ya Makete kwa namna wanavyowapa ushirikiano mkubwa Viongozi wa TALGWU na kuwa sehemu ya utatuzi wa changamoto mbalimbali zinazowakabili watumishi katika maeneo yao ya kazi.

Aidha, DED Namaumbo amewasifu Viongozi wa Kitaifa na Mkoa wa TALGWU kwa kuwa bega kwa bega na Viongozi wa TALGWU ngazi ya Wilaya na Matawi ndani ya Wilaya ya Makete.

"Niwasihi wana TALGWU wenzangu nanyi mkiwa kama Viongozi kuendelea kuwa daraja kati ya watumishi na waajiri, tuendelee kuwaasa watumishi kufuata sheria, kanuni na taratibu zinazotuongoza watumishi wa Umma na asiwepo anayeenda kinyume na taratibu hizi za Utumishi wa Umma. Rais wa awamu ya sita wa Jamhuri ya Muungano wa Tanzania Mhe. Samia Suluhu Hassan anatutegemea sana kwani kwa uwajibikaji wetu kwenye maeneo yetu na kutatua kwetu kero na migogoro ndio jambo la msingi katika kuelekea kwenye maendeleo jumuishi ndani ya Taifa letu" amesisitiza DED Francis Namaumbo.

Wakati wa kikao hicho kilichohudhuriwa pia na Kaimu Afisa Utumishi na Utawala Wilaya ya Makete Ndg Asukile Mbogela amewasihi Viongozi wa Chama cha TALGWU kuendelea kushirikiana vema na Vyama vingine vya wafanyakazi kama TUGHE ili kuimarisha ushirikiano wa wanachama wao maeneo ya kazi.

#SolidarityForever

#MshikamanoDaima