WAANDIKISHAJI WASAIDIZI NA WAENDESHA VYOMBO VYA BAYOMETRIKI WATAKIWA KUZINGATIA SHERIA NA KANUZI ZA UANDIKISHAJI WAPIGA KURA

Tarehe Iliyowekwa: April 29th, 2025

Afisa Mwandikishaji wa Jimbo la Makete, Bi. Jacklina Mrosso, amewataka Waandikishaji pamoja na Waendesha vifaa vya Bayometriki kufanya kazi kwa kuzingatia kanuni na sheria zinazowaongoza katika uboreshaji wa Daftari la Kupiga kura awamu ya Pili, ambalo linategemewa kuanza Mei 1 hadi 7, 2025.

Bi. Jacklina Mrosso, amebainisha hayo leo Aprili 29,2025, wakati akifungua mafunzo kwa Waandikishaji na Waendesha vifaa vya Bayometriki, ambayo yamefanyika leo katika vituo viwili vya Iwawa pamoja na Tandala, ikiwa ni kuelekea katika awamu ya pili ya Uboreshaji wa Daftari la Kudumu la Mpiga kura, pamoja na Uwekaji Wazi wa Daftari Kudumu la Mpiga kura awamu ya kwanza.

“Nendeni mkafanye kazi kwa ushirikiano mkubwa, sambamba na kuhakikisha kuwa kila mwananchi ambaye hakuandikisha anapata fursa ya kujiandikisha na wale ambao watakuwa wanataka kuboresha taarifa zao waweze kufanya hivyo, kwakuwa mmeaminiwa na Tume Huru ya Taifa ya Uchaguzi” Alisema Bi. Mrosso.

Aidha, Afisa Mwandikishaji, amesema kuwa, Jimbo zima la Makete, lina vituo 37, ambapo kila kituo kina waandikishaji wawili ambao watahakikisha kuwa wananchi wanapata huduma kwa wakati, na kwamba vituo hivyo vitafunguliwa kwa wakati ili huduma iweze kutolewa kwa weledi.

Kwa Upande wake, Afisa TEHAMA, kutoka Tume Huru ya Taifa ya Uchaguzi, Bi. Elizabeth Salale, akitoa mafunzo kwa Waandikishaji wasaidizi pamoja na Waendesha Vifaa vya Bayometriki, amewataka waandikishaji hao kutosita kuwasilisha changamoto kwa mamlaka husika endapo watapata shida katika utekelezaji wa zoezi hilo, pamoja na kujaza fomu zote kiufasaha kabla ya kuingiza kwenye mfumo.

Ikumbukwe kuwa, Zozezi hilo la Uboreshaji wa Daftari la Kudumu la Mpiga Kura, kwa Jimbo la Makete, linategemewa kuanza Tarehe 1 hadi 7 mwezi 5,2025, likienda sambamba na uwekaji wazi wa Daftari la Kudumu la Mpiga Kura kwa awamu ya Kwanza ambalo lilifanyika mwezi wa kwanza mwaka huu wa 2025.