WADAU WA UBORESHAJI WA DAFTARI LA KUDUMU LA MPIGA KURA, WAOMBWA KUTOA ELIMU KWA WANANCHI JUU YA UMUHIMU WA KUJIANDIKISHA

Tarehe Iliyowekwa: January 7th, 2025

Wadau wa Uboreshaji wa Daftari la Kudumu la Mpiga kura Wilayani Makete wameombwa kutoa ushirikiano kwa kutoa elimu kwa wananchi juu ya umuhimu wa Kujiandikisha na Kuboresha taarifa zao kwenye daftari la Kudumu la Mpiga kura ikiwa ni kuelekea kwenye uchaguzi mkuu hapo baadae.

Rai hiyo imetolewa na Mwakilishi wa Mkuu wa Wilaya ya Makete, ambaye ni Afisa Tawala wa Wilaya ya hiyo, Ndg. Onesphoria Ngogo,wakati akizungumza kwenye mkutano wa wadau wa Uboreshaji wa Daftari la Kudumu la Mpiga kura, ambao umefanyika katika ukumbi wa Bomani, uliopo Halmashauri ya Wilaya ya Makete.

“Wadau mna nafasi kubwa sana ya kwenda kuhamasisha watu wakajiandikishe kwenye Daftari la Kudumu la Mpiga Kura, ili waweze kupiga kura mara baada ya kutangazwa kwa tarehe ya Uchaguzi mkuu mwishoni mwa mwaka huu wa 2025” Alisema Ndg. Ngogo.

Kwa Upande wake, Mkurugenzi Mtendaji wa Halmashauri ya Wilaya ya Makete, Ndg. William M. Makufwe, amesema lengo la kuwakutanisha katika kikao hicho ni kujadili namna bora ya kuwahamasisha wananchi kujitokeza kwa wingi katika kujiandikisha ikiwa ni pamoja na kupeana taarifa za zoezi zima la Uboreshaji wa Daftari hilo la kudumu la Mpiga kura.

Sambamaba na hayo, Ndg, Makufwe amesema kuwa, zoezi hilo ni tofauti kabisa na uchaguzi wa Serikali za Mitaa, hivyo wananchi wanapaswa  kujiandikisha ili waweze kupata kitambulisho ambacho kitatumika katika uchaguzi mkuu wa Rais, Mbunge na Diwani.  

Naye, Afisa Mwandikishaji wa Jimbo la Makete, Bi. Jacklina Mrosso, amesema kuwa, jimbo hilo lina vituo 166 vya uchaguzi, ambapo kila kituo INEC wameweka mwandikishaji msaidizi pamoja na mwendesha kifaa cha Biyometriki na kwamba zoezi hilo litafanyika kwa weledi na maarifa ya kutosha.

Naye Afisa uchaguzi wa Jimbo la Makete, Ndg. Castory Ngonyani, akijibu hoja za Wadau, amesema kuwa hakuna nyongeza ya siku, zaidi ya zile zilizopangwa na Tume Huru ya Taifa ya Uchaguzi, hivyo kila mdau kwa sehemu yake akawe sehemu ya zoezi hilo la Uandikishaji na Uboreshaji wa Daftari la Kudumu la Mpiga kura, sambamba na kusoma miongozo na kanuni zinazosimamia zoezi hilo la uandikishaji wa wapiga kura.

Ikumbukwe, kuwa INEC wapo kwenye zoezi la Uboreshaji wa Daftari la Kudumu la Mpiga Kura nchi nzima, ambapo kwa Jimbo la Makete, zoezi hilo litaanza Januari 12 hadi 18, mwaka huu wa 2025.