WALIMU WILAYANI MAKETE WAHIMIZWA KUSIMAMIA VIZURI UTOLEWAJI WA ELIMU KWA WANAFUNZI

Tarehe Iliyowekwa: November 19th, 2024

Mkuu wa Wilaya ya Makete, Mhe. Juma S. Sweda, amewataka walimu pamoja na wakuu wa taasisi za elimu wilayani humo kuhakikisha kuwa wanasimamia vizuri utolewaji wa elimu ili watoto waweze kufaulu kwa wastani mzuri.

Kauli hiyo imetolewa leo Novemba,19,2024 katika kikao cha Kamati ya Ushauri ya Wilaya ya Makete, ambacho kimefanyika katika Ukumbi wa Bomani, uliopo makao makuu ya Halmashauri ya Wilaya ya Makete.

“Kila mtu mwenye eneo lake akatimize wajibu wake hakuna kusingiziana, mara mzazi mara mtoto, hakikisheni mnafanya kazi zenu kiufasaha kwa kujua changamoto wanazopitia wanafunzi ili ziweze kutatuliwa kwa wakati” Alisema Sweda.

Aidha, Mhe. Sweda, ameipongeza Halmashauri ya Wilaya ya Makete kwa kuwa na ushirikiano mzuri katika utekelezaji wa miradi ya maendeleo ambayo imekuwa ikitekelezwa katika Halmashauri hiyo, ambayo imekuwa na miradi mingi ya Maendeleo upande wa Afya, Elimu pamoja na miundombinu ya barabara.w

Sambamba na hayo, Mhe. Sweda, amewataka wakazi wa Wilaya ya Makete kuwa wamoja katika masuala yote ya kimaendeleo ikiwa ni pamoja na kuhakikisha wanakuwa na kauli moja juu ya mchakato wa uanzishwaji wa Halmashauri mpya ya Wilaya ya Kitulo ambayo itakuwa na makao makuu katika Kata ya Matamba.

Kwa upande wake, Mkurugenzi Mtendaji wa Wilaya ya Makete, Ndg. William M. Makufwe, amewataka watumishi wa kada ya Ualimu kuhakikisha kuwa wanawajibika kikamilifu ili kuongeza ufaulu kwa wanafunzi wa darasa la saba, kutokana na kushukua kwa asilima 5 za ufaulu wa wanafunzi hao.

Ndg. Makufwe, amesema kuwa, kumekuwa na changamoto kubwa ya watumishi kuhama ambayo pia imekuwa chanzo cha kushuka kwa ufaulu kwa wanafunzi Wilayani humo, pamoja na kuanzishwa kwa sheria ndogo ambazo zitawabana wazazi na walezi wa watoto ambao hawaendi shule pamoja na kuwashawishi kufeli mitihani.

Katika hatua nyingine, Ndg. Makufwe amesema kuwa kwa mwaka wa fedha wa 2024/2025, wakulima wa Halmashauri ya Wilaya ya Makete wamefanikiwa kuuza tani zaidi ya elfu nne za zao la Ngano, na kupata pesa zaidi ya Bilioni 3.9, kutokana na mavuno ya zao hilo.

Nae mmoja wa waalikwa wa kikao hicho Cha DCC, ambaye ni Mwenyekiti mstaafu wa Chama cha Mapinduzi mkoa wa Njombe, Mzee Mwamwala, amewasihi watumishi wa Umma kuhakikisha kuwa wanatunza miundombinu ambayo imeletwa na Serikali katika maeneo yao ili iweze kutumika kwa mda mrefu.