WANANCHI WAANZA UJENZI WA BARABARA

Tarehe Iliyowekwa: August 6th, 2022

Wananchi kutoka vijiji vitatu kwa kushirikiana na Mbunge Jimbo la Makete Mh. Festo Sanga wamekutana na kuamua kutengeneza barabara ya kuunganisha vijiji hivyo kwa lengo la kurahisha huduma za usafiri kutoka Imehe kuelekea Ilevelo.

Wananchi hao ni kutoka Kijiji cha Imehe, Ilevelo na Ugabwa wamekutana  tarehe 04 Agosti 2022 eneo la Gwamanga ambalo ni katikati ya vijiji hivyo na kuanza shughuli ya Maendeleo kwa kusafisha mazingira kwa kukata miti mikubwa pembezoni mwa mwa barabara itakayounganisha vijiji hivyo vitatu.

Mbunge Jimbo la Makete Mh. Festo Sanga ameshiriki katika shughuli hiyo ya kusafisha barabara itakayounganisha vijiji hivyo ambayo itafungua shughuli za kiuchumi kwa wananchi wa vijiji hivyo na kurahisha huduma za usafiri.

“Niwashukuru wananchi kwa kujitokeza na kushirikiana kufanya kazi hii, najua umuhimu wa barabara hii inayounganisha vijiji vitatu…tuliwasiliana na TARURA ambao walishafika hapa kuangalia barabara hii, tunategemea watatupa bajeti ili kuijenga kwa mitambo lakini niwashukuru wadau wanaoishi nje ya Kijiji cha Imehe kwa kujitolea kupasua mawe yalipo kwenye barabara na niwaombe waendelee kuungana nasi katika shughuli za maendeleo”.

Mwenyekiti wa Ujenzi wa Barabara hiyo amesemshukuru Mbunge kwa ushirikiano wake kwa kuamua kushiriki shughuli za maendeleo na wananchi wa vijiji hivyo na kwamba amewatia moyo zaidi katika ujenzi wa barabara hiyo.

Mwenyekiti wa Kijiji cha imehe ndugu Ibrahimu Kyando amesema kazi ya kuunganisha barabara hiyo ilianza tangu mwaka 2019 na wanatarajia mwaka huu inaweza kukamilika na shughuli za uzalishaji kiuchumi kuanza.

“Kwa umoja wetu unaotambulika kama Gwamanga nguvu moja tumeamua kushirikiana kwa Pamoja ili tujenge barabara hii ianze kupitika msimu wote wa mwaka, hapa tutapata fedha nyingi kupitia raslimali zilizopo kwenye milima hii ikiwemo Kilimo, Mbao n.k”