WAZIRI CHANA AWATAKA WAKAZI WA MAKETE KUTUNZA HIFADHI ZA KITAIFA, SAMBAMBA NA KUZIFANYA FURSA

Tarehe Iliyowekwa: April 15th, 2025

Waziri wa Maliasili na Utalii, Mhe. Balozi Dkt. Pindi Chana amewataka wakazi wa Wilaya ya Makete, iliyopo Mkoani Njombe, kuhakikisha kuwa wanaachana na tabia ya kuharibu mazingira kwa kufanya shughuli za mbalimbali za kibinadamu ambazi ni hatarishi kwa ustahimilivu wa Hifadhi za Taifa.

Waziri Dkt. Pindi Chana, amesema hayo leo Aprili 15,2025, wakati akifungua seminaya kuwajengea uwezo wadau wa uhifadhi, kuhusu uanzishaji wa Jumuiya za Hifadhi za Wanyamapori (WMAs) na mikakati ya kukabiliana na changamoto za wanyamapori wakali na waharibifu, ambayo imefanyika katika ukumbi wa mikutano wa Halmashauri ya Wilaya ya Makete.

"Wilaya hii ya Mkaete, inapakana na maeneo yaliyohifadhiwa kama vile Hifadhi ya Taifa Kitulo, Pori la Akiba la Mpanga- Kipengele na misitu ya hifadhi ya Chimala,ambayo inasimamiwa na TFS, pamoja na eneo la Ushoroba wa Ndukunduku unaounganisha Hifadhi ya Taifa Kitulo na Pori la Akiba Mpanga Kipengele, hivyo basi hii ni Fursa kwenu kwa kujenga mioundombinu ambayo itakuwa na tija kiuchumi” alisema Waziri Chana.

Aidha, Mhe. Chana maeongeza kuwa, kupitia mafunzo hayo wananchi watajifunza mbinu mbalimbali za kukabiliana na wanyamapori wakali na waharibifu, kupambana na masuala ya moto pamoja na uanzishaji wa Jumuiya za Hifadhi za Wanyamapori, na kuwataka viongozi hao kuwa mabalozi wazuri kwa wananchi wao kupitia mikutano ya vijiji na kata.

Sambamba na hayo, Waziri huyo, amesema kuwa, Serikali kupitia Wizara ya Mali Asili na Utalii, imekuwa ikitatua changamoto mbalimbali za wanyamapori wakali na waharibifu, ambapo kumekuwepo na doria za ushirikiano wa taasisi za TAWA, TANAPA ili kudhibiti uharibifu wa wanyama hao kwenye makazi ya watu.

Naye, Naibu Katibu Mkuu wa Wizara ya Maliasili na Utalii (anayeshughulikia Mali Asili), CP Benedict Wakulyamba, amewataka wakazi wa Wilaya ya Makete, kuzilinda hifadhi za Taifa, sambamba na kutumia fursa hizo kuwa chanzo cha kukuza uchumi wa kaya na taifa zima kwa ujumla.

Kwa Upande wake, Mkuu wa Wilaya ya Makete, Mhe. Kissa Gwakisa Kasongwa, ameishukuru Serikali kupitia Wizara hiyo, kwa kuendesha Mafunzo hayo ambayo yamekuwa na tija kubwa kwa wakazi wa Wilaya ya Makete, na kwamba imekuwa ni njia mojawapo ya kuwajengea uwezo wa kutambua fursa mbalimbali zinazopatikana kupitia hgifadhi za Taifa, pamoja na utuzanzaji wake.