WAZIRI ELIMU PROF MKENDA AWATAKA WANAMAKETE KUENDELEA KUIAMINI SERIKALI ILIYOPO MADARAKANI

Tarehe Iliyowekwa: October 5th, 2024

Waziri wa Elimu, Sayansi na Teknolojia Mhe, Prof. Adolf Mkenda, leo Agosti 5,2024 amewataka wakazi wa Wilaya ya Makete kuendelea kiunga mkono serikali ya Jamhuri Ya Muungano wa Tanzania, inayoongozwa na Mhe. Dkt. Samia Suluhu Hassan, kutokana na uboreshaji wa kila sekta ambazo zimekuwa zikiwagusa wananchi.

Prof. Mkenda amesema hayo leo Oktoba 5,2024 akiwa ziarani Wilayani Makete, wakati akikagua na kuzindua miradi ya Elimu upande wa Sekondari ambayo ni madarasa 22, matundu 36, na Mabweni Manne katika shule za Sekondari Iwawa na Shule ya Sekondari ya Wasichana ya Makete, Kituo cha Afya Lupalilo pamoja Mradi wa Usambazaji maji Iwawa.

“wananchi mnachotaka ni Maendeleo, na mmekuwa mkiwachagua viongozi wenu ili wawaletee maendeleo hivyo basi endeleeni kuiamini serikali iliyopo madarakani kwasababu imekuwa ikiwaletea maendeleo kwenye maeneo, leo nimepita baabara ya Njombe-Makete ni bora sana hii kweli ni Ulaya ndogo” alisema Waziri Prof. Mkenda.  

Aidha, Waziri Mkenda, amewataka wakazi wa Makete, kuendelea kuwaamini viongozi waliowachagua kwasababu wamekuwa na ushawishi mkubwa serikalini na kupelekea uwepo wa miradi yakutosha ambayo ni  mizuri na imekuwa msaada mkubwa kwa wananchi hususani Elimu na Afya, na kwamba amelisikia ombi la Ujenzi wa Mabweni katika shule ya Sekondari Iwawa.

Kwa Upande wake katibu Tawala wa mkoa wa Njombe, Bi. Judica Omari, amesema kuwa, ujio wa Waziri wa Elimu Mhe, Prof. Adolf Mkenda umekuwa na tija kwa mkoa wa Njombe, kwakuwa umekuwa chachu kuelekea uchaguzi wa Serikali za Mitaa.

“nawaomba mkajiandikishe ili msipoteze haki zenu za msingi za kuwachagua viongozi ambao watakuwa chachu ya Maendeleo katika maeneo yenu” Alisema Bi. Judica Omari.

Naye, Mwenyekiti wa Chama cha Mapinduzi, CCM, Wilaya ya Makete, Ndg. Clemence Mwawite Ngajilo, amemshukuru Rais wa Jamhuri ya Muungano wa Tanzania Mhe. Dkt. Samia Suluhu Hassan kwa kuendelea kuwaamini viongozi waliopo Wilayani Makete kwakuwa wamekuwa wasimamizi wazuri wa miradi ya Elimu, Afya ambayo imekuwa msaada mkubwa kwa wananchi wa wilaya hiyo.

Nao baadhi ya viongozi mbalimbali akiwemo, wMbunge wa Jimbo la Makete, Mhe. Festo Sanga, amesema kuwa serikali imekuwa sikivu sana, hivyo anategemea wananchi atairudisha tena madarakani kuanzia uchaguzi wa serikali za mitaa ambako ndio mzizi wa maendeleo ya wananchi.

Ikumbukwe kuwa, ziara hiyo ya Waziri wa Elimu, Sayansi na Teknolojia ililenga kukagua miradi mbalimbali wilayani Makete, ambapo miradi ya Elimu katika shule za Sekondari Iwawa na Shule ya Sekondari wasichana Makete imezinduliwa, Kituo cha Afya Luapalilo kimezinduliwa, pamoja na Ukaguzi wa mradi wa ulazaji mabomba ya maji katika mji mdogo wa Iwawa.