MKUU WA WILAYA YA MAKETE AWATAKA WASAMBAZAJI WA PEMBEJEO ZA KILIMO KUFUATA SHERIA

Tarehe Iliyowekwa: October 8th, 2025

Mkuu wa Wilaya ya Makete, Mhe. Kissa Gwakisa Kasongwa, leo Oktoba 8,2025, amewataka wasambazaji wa Pembejeo za kilimo hususani Mbolea kufuata sheria zilizowekwa na serikali katika uuzaji wa bidhaa hizo ili kutoingia migogoro na Serikali pamoja na wakulima au kupoteza bishara zao.

Mhe. Kasongwa, amesema hayo wakati akiongoza kikao cha Wadau wa Pembejeo za kilimo Wilayani Makete, katika Ukumbi wa Bomani, ambacho kililenga kutafuta suluhu ya gharama za uuzaji na usambazaji wa bidhaa hiyo kutokana na changamoto ya Jiografia iliyopo ndani ya Wilaya ya Makete.

“niwaombe sana wafanyabishara na wasambazaji wa pembejeo hizi za kilimo tufuate sheria zilizowekwa na serikali katika kuhakikisha kuwa mnauza bei elekezi ya ruzuku bila kumnyonya mkulima, kuongeza bei ni kosa la Jinai, na leo tumependekeza ongezeko la elfu 3000 ,2000 na 1500, kulingana na umbali, ili kuwasaidia kufikisha mbolea kwa wakulima” alisema Mhe. Kissa Kasongwa.

Kwa Upande wake, Mkurugenzi Mtendaji wa Halmashauri ya Wilaya ya Makete, Ndg, Jerry Diamon Mwaga, amewapongeza wafanyabishara hao kwa kuweka msawazo wa changamoto ambazo zimekuwa zikiwakabili, na kwamba waende wakawasaidie wakulima kuhakikisha kuwa wanapata pembejeo kwa wakati kwakuwa Halmashauri inaendelea kuweza mazingira  bora ya uwekezaji katika Kilimo.

Naye, Meneja wa TFRA, Kanda ya Nyanda za Juu Kusini, Ndg. Joshua Ng’ondya, amewataka wasambazaji hao kuacha tabia ya kulangua pembejeo za kilimo kwakuwa ni kosa la jinai, hivyo kila mmoja ahakikishe anasimamia leseni yake inavyomtaka, sambamba na kuhakikisha kuwa wanawahudumia wakulima waliosajiliwa ili kutowapa hasara wasambazaji wakubwa.

Hata hivyo, Mkuu wa Idara ya Kilimo Uvuvi na Mifugo, Mhandisi Evans Mdee, amewataka wafanyabiashara hao kuweka takwimu sahihi za wakulima ambao wamekuwa wakinunua mbolea kwao ili iwasaidie katika kupata uhitaji wa pembejeo za kilimo.

Akizungumza kwa niaba ya wasambazaji wa Mbolea Wilaya ya Makete, Mama Tuli Mwasanga, ameishukuru serikali kwa kusikia kilio chao kwa kukubaliana na ombi lao la kuongeza kiasi kisichozidi elfu 3000 kwa kata na maeneo ya mbali kama vile kata ya Lupila na Kinyika.