MKUU WA WILAYA YA MAKETE MHE. KISSA KASONGWA AWATAKA WAFANYABISHARA WILAYANI HUMO KUWEKEZA NYUMBANI

Tarehe Iliyowekwa: November 12th, 2025

Mkuu wa Wilaya ya Makete, Mhe. Kissa Gwakisa Kasongwa, leo Novemba 12,2025, ameongoza Kikao cha Baraza la Wafanyabiashara wa Halmashauri ya Wilaya ya Makete, ambacho kimefanyika katika Ukumbi wa Bomani na kukutanisha wadau mbalimbali wa sekta ya Biashara Wilayani humo.

Akifungua Baraza hilo, Mhe. Kissa Kasongwa, amewataka wataalam kutoka Serikalini kuhakikisha kuwa wanatatuta changamoto za wafanyabiashara ili kuhakikisha kuwa mazingira yao ya ufanyaji kazi yanakuwa rafiki katika kukuza uchumi wa Wilaya ya Makete pamoja Taifa zima kwa Ujumla.

“Makete inafunguka kiuchumi, watu wengi wanataka kuja kuwekeza Makete, hivyo basi nanyinyi wafanyabiashara hakikisheni kuwa mnawekeza kwenye viwanda vikubwa, ardhi pamoja na maeneo mengine kwasabau Wilaya hii ina fursa nyingi sana endapo kama ukiamua kuzitumia fursa hizo” alisema Mhe. Kissa.

Aidha, ameongeza kuwa lengo la serikali ni kuhakikisha kuwa kila mfanyabiashara, mjasiriamali anapata mazingira wezeshi ambayo yatamfanya aweze kufanya shughuli zake za kujiongezea kipato bila bughudha, hivyo basi mabaraza ni sehemu ambayo mtu anaweza kusema changamoto anayopitia ili iweze kutatuliwa.

Kwa upande wake Katibu Tawala wa Wilaya ya Makete, Bi. Grace Mgeni, amewapongeza watalaam wa Serikali kwa kuendelea kutoa huduma nzuri kwa wafanyabishara kutokana na kupungua kwa kero za wafanyabishara Wilaya ya Makete, kulingana na ilivyokuwa hapo awali.

Pia, Bi. Grace Mgeni, ameziomba taasisi za Serikali ziendelee kuwa mstari wa mbele katika kuhakikisha kuwa wanaweka mazingira wezeshi ya mfanyabiashara kufanya shughuli zake kiufasaha na anapokutana na changamoto aweze kutatuliwa kwa haraka, sambamba na kuwasihi wafanyabiashara hao kuzitumia ofisi za Serikali kwakuwa zipo kwa ajili yao.

Nao wafanyabishara wa Wilaya ya Makete, akiwemo Diwani Mteule wa Kata ya Tandala, Mhe. Ignatio Mtawa, amesema kuwa kuna changamoto ya uelewa kwa wananchi pamoja na wajasiriamali wadogo kuhusu namna kodi zinavyotozwa kupitia mifumo mbalimbali ambapo ameziomba Mamlaka husika kama vile TRA kuendelea kutoa elimu ili wajasiriamali hao waweze kuwa na uelewa mpana wa kodi.