ANUANI ZA MAKAZI

Tarehe Iliyowekwa: May 28th, 2022

Katibu Tawala Mkoa wa Njombe Bi. Judica Omari amepongeza zoezi la anuani za Makazi lilivyotekelezwa Wilayani Makete Mkoani Njombe.

Pongezi hizo zimetolewa leo Mei 28 wakati wa ukaguzi maalumu wa kuangalia jinsi zoezi lilivyotekelezwa kwenye makazi ya watu, Taasisi za kiserikali na zisizo za kiserikali alipotembelea Kata ya Mang’oto, Tandala, Lupalilo, Iwawa na Bulongwa.

Bi. Judica amewataka watendaji wa Vijiji vyote na Kata zote Wilayani Makete kuandaa daftari litakalokuwa na orodha ya majina ya wananchi wote na namba zao za simu, kaya zote na mitaa yote kwa kuwa zoezi hili litaendelea kuboreshwa zaidi.

Watendaji wa Kata ya Mang’oto, Tandala, Lupalilo, Iwawa na Bulongwa wakati wakitoa taarifa za namna zoezi lilivyofanyika, wamesema zoezi la anuani za makazi kwenye makazi ya watu, taasisi mbalimbali, nguzo za mitaa na barabara limekamilika kwa asilimia 100.

Mkuu wa Wilaya ya Makete Mh. Juma Sweda amempongeza Mkurugenzi mtendaji wa Halmashauri ya Wilaya ya Makete Ndg. William Makufwe, watendaji wa vijiji na kata kwa kazi kubwa waliyoifanya katika usimamizi wa zoezi hilo la anuani za makazi.

“Niwapongeze wasimamizi wa zoezi hili kuanzia Mkurugenzi Mtendaji wa Halmashauri, watendaji wa vijiji na watendaji wa Kata wamefanya kazi kubwa ya kusimamia na hasa kata ya Mang’oto walikuwa wa kwanza kumaliza zoezi hili”.

Mkurugenzi Mtendaji Halmashauri ya Wilaya ya Makete Ndg. William Makufwe amesema Pamoja na changamoto mbalimbali walizokutana nazo, zoezi limefanikiwa vizuri na kuahidi kuyafanyia marekebisho kadhaa ambayo yamebainika wakati wa ukaguzi ambazo ni baadhi ya watu kuweka namba za vibao kwenye maeneo ambayo ni ngumu kuitambua namba hiyo

Pia baadhi ya nguzo za barabara za mitaa kuwekwa karibu sana na barabara hivyo zihamishwe ili zisiharibiwe na watumiaji wa barabara.

Zoezi la ukaguzi wa Anuani za makazi na nguzo za mitaa na barabara linafanyika kwa muda wa siku mbili Mkoa mzima wa Njombe kuanzia tarehe 28-29, Mei 2022 likiongozwa na Mkuu wa Mkoa Mh. Waziri Kindamba.