DED MWAGA AAGIZA KUKAMILISHA MIRADI KWA HARAKA

Tarehe Iliyowekwa: November 26th, 2025

Mkurugenzi Mtendaji wa Halmashauri ya Wilaya ya Makete, Ndg. Jerry Daimon Mwaga, leo Novemba, 26,2025, ametembelea na kukagua miradi yenye thamani ya Shilingi milioni 308,000,000.00 katika Kata za Ukwama na Tandala.

Mara baada ya kutembelea miradi hiyo, Ndg. Mwaga amemwagiza Mwalimu Mkuu wa Shule ya Msingi Ihanga, Ndg. Frank Naborth Ngogo, kuchukua hatua za haraka dhidi ya fundi anayetekeleza miradi katika shule hiyo, kutokana na kusuasua kwa ukamilishaji wa mejengo hayo ambayo ni Madarasa 4, na Vyoo matundu 6 yenye thamani ya shilingi Milioni 112, 000,000.00.

Sambamba na hayo, Ndg. Mwaga amewataka mafundi wote wanaotekeleza miradi ndani ya Halmashauri ya Wilaya ya Makete, kuhakikisha kuwa kazi zote ambazo hazitegemeani zikamilike kwa wakati ili kukimbizana na hali ya hewa ambayo mara nyingi imekuwa kikwazo katika ukamilishaji wa Miradi ya Maendeleo.

Ikumbukwe kuwa, Ndg. Mwaga, amekagua na kutembelea miradi ya Ujenzi wa Madarasa 9, Vyoo matundu 6, Ofisi ya Mwalimu pamoja na kituo cha Walimu TRC, katika Shule za Msingi mbili ambazo ni Tandala na Ihanga, ambapo kesho Novemba 27,2025 anatarajia kufanya ukaguzi wa miradi katika Kata ya Lupila, Kijiji cha Kidyombo.