BARAZA LA ARDHI LAANZA KAZI MAKETE

Tarehe Iliyowekwa: March 23rd, 2023

Baraza la Ardhi na nyumba Wilaya ya Makete limeanza kufaya kazi rasmi hii leo tarehe 23 Machi, 2023 ambapo limeanza kusikiliza mashuri ya Migogoro ya Ardhi kwa wananchi wa Makete.

Kabla ya Baraza hili kuanza kufanya kazi wananchi wa Makete walikuwa wanalazimika kusafiri zaidi ya Kilomita 100 kwenda Njombe kwa ajili ya kufuata huduma ya utatuzi wa Migogoro ya Ardhi.

Ikumbukwe kwamba utatuzi wa Migogoro ya Ardhi inaanzia ngazi ya Baraza la Kata lenye Mamlaka ya kusikiliza na kusuluhusisha Migogoro ya Ardhi (Haina Mamlaka ya kutoa hukumu Bali ni kufanya usuluhishi tu), endapo Usuluhishi ukishindikana katika Baraza la Kata wahusika wanaweza kufungua shauri katika baraza la Ardhi na nyumba Wilaya na kama hawakuridhika na uamuzi wanaweza kukata rufaa kwenda Mahakama Kuu na chombo cha juu kabisa cha kusikiliza rufaa ni Mahakama ya Rufaa Tanzania.

Kuanzishwa kwa baraza la Ardhi na nyumba Wilaya ya Makete itasaidia wananchi kupunguza gharama za kuendesha mashauri ya Ardhi na muda waliokuwa wanatumia kwani wananchi hawatasafiri kwenda Njombe kwa kuwa Sasa watapata huduma ndani ya Wilaya ya Makete.

Kuanza kwa Baraza la Ardhi na nyumba leo kumehudhuriwa na Mwenyekiti wa Baraza la Ardhi na nyumba la Wilaya Mh.Gaudensia Ngh'umba, Wazee wa Baraza, Mawakili wa Serikali na Mawakili wa kujitegemea.

Baadhi ya Wananchi waliohudhuria uanzishwaji wa Baraza hilo wameishukuru Serikali kwa kuanzisha Baraza hilo ambapo awali walikuwa wakitumia gharama nyingi kwenda Njombe

Ikumbukwe kuwa tangu Uhuru Wilaya ya Makete haijawahi kuwa na Baraza hilo, hivyo jitihada za Ofisi ya Mkuu wa Mkuu wa Wilaya ya Makete ikiongozwa na Mkuu wa Wilaya Mhe. Juma  Sweda, Ofisi ya Mkurugenzi Mtendaji Halmashauri ya Wilaya ya Makete ikiongozwa na Mkurugenzi William Makufwe wamefanya jitihada kubwa kuhakikisha Wizara ya Ardhi inafungua Ofisi ya Baraza la Ardhi na nyumba Makete ambapo Halmashauri imefanya ukarabati wa nyumba inayomilikiwa na Halmashauri kuhakikisha wanarahisisha upatikanaji wa huduma kwa wananchi wake.

Mabaraza ya Ardhi na nyumba ya Wilaya yanaundwa chini ya Sheria ya Mahakama za Utatuzi wa Migogoro ya Ardhi sura ya 216.

Uzinduzi rasmi wa huduma ya Baraza la Ardhi na nyumba Makete ufanyika siku  chache zijazo.