BENKI YA NMB MAKETE IMEKABIDHI BATI 200 ZAHANATI YA IVILIKINGE

Tarehe Iliyowekwa: June 13th, 2022

Benki ya NMB-Tawi la Makete imekabidhi msaada wa bati 200 zenye thamani ya Milioni nane kwa ajili ya kusaidia ujenzi wa zahanati ya kijiji cha Ivilikinge Kata ya Isapulano Wilayani Makete Mkoani Njombe

Mgeni rasmi kwenye makabidhiano yaliyofanyika leo Juni 13, 2022 kijijini hapo alikuwa ni Mkuu wa Wilaya ya Makete Mhe. Juma Sweda ambaye amewashukuru wadau wa Benki hiyo na wadau wa Maendeleo kijijini hapo Mwapima Forum ambao pia wametoa Misumari na fedha kiasi cha Shilingi Laki 5 kusaidia Ujenzi huo

Meneja NMB Kanda Ndg. Straton Chilongola amesema msaada huo ni katika kurudisha fadhila kwa jamii na wateja wa Benki hiyo  ambapo Benki imeendelea kutoa michango mbalimbali katika sekta ya Elimu na Afya

“Katika Wilaya ya Makete Benki yetu imekuwa ikitoa misaada mbalimbali ambapo tumesaidia vifaa shule ya Sekondari Isapulano, Lupila, Mount Chefukwe, vifaa tiba kituo cha Afya Matamba na leo tumeleta bati hapa zahanati ya Ivilikinge”.

Balozi wa Benki hiyo Ndg. Award Mpandila amewashukuru wadau hao kwa kusaidia wananchi wa Ivilikinge kwa upande wa afya  jambo ambalo amesema ni vigumu kwa taasisi zingine kulifanya kwa maeneo ya vijijini kama Ivilikinge.

Wananchi wa Kijiji cha Ivilikinge wamewashukuru NMB na wadau wa Maendeleo kijijini MWAPIMA FORUM hapo kwa msaada huo huku wakisema kukamilika kwa zahanati hiyo kutasaidia kupata huduma za Afya karibu na makazi yao.

Katika ujenzi wa Zahanati hiyo nguvu za wananchi, wadau wa Maendeleo MWAPIMA FORUM, Mbunge Jimbo la Makete Mh. Festo Sanga wameshirikiana kujenga jingo hilo na kufikia hatua ya kupiga bati.