DC SWEDA AHIMIZA WAJAWAZITO KUJIFUNGULIA KWENYE VITUO VYA KUTOLEA HUDUMA ZA AFYA

Tarehe Iliyowekwa: July 12th, 2021

Mkuu wa Wilaya ya Makete Mhe. Juma Sweda amewahimiza wanawake wenye ujauzito kuhudhuria kliniki wakati wote wa kulea mimba na kuhakikisha wanajifungulia kwenye Vituo vya kutolea huduma za Afya.

DC Sweda ameyasema haya wakati akiwa kwenye ziara yake ya kikazi kwenye Kata ya Luwumbu alipokuwa akizungumza na Wananchi kwenye Mkutano wa hadhara mara baada ya kuitembelea Zahanati ya Luwumbu.

"Serikali kila siku inajitahidi kuendelea kuboresha huduma za Afya kwa kuwezesha ujenzi wa Zahanati, Vituo vya Afya, Hospitali ikiwa ni pamoja na kuimarisha upatikanaji wa huduma na madawa hivyo ili tuwe na vizazi vingi vyenye uhai ni lazima tuhakikishe wanawake wajawazito wanajifungulia sehemu salama kwenye Vituo vya kutolea huduma za Afya na tuache tabia za kujifungulia majumbani" amesisitiza Mhe. Juma Sweda.

Aidha, kupitia Mkutano huo wa hadhara Diwani wa Kata hiyo, Mhe. Felicks Kyando amewasilisha kero mbalimbali za wananchi wa Kata hiyo ikiwemo ubovu wa barabara, uchache wa rasilimali fedha za kukamilishia ujenzi wa majengo ikiwemo umaliziaji wa daharia ya wasichana Shule ya Sekondari Usililo na Ujenzi wa jengo la Utawala Shule ya Sekondari Usililo pamoja na Ujenzi wa Ofisi ya Mtendaji wa Kata.

Hata hivyo, Mkurugenzi Mtendaji wa Halmashauri ya Wilaya ya Makete Ndugu Francis Namaumbo amewahamasisha Viongozi kwenye Vijiji na Kata kuendelea kuibua miradi na kuisimamia hasa kusimamia vema fedha zinazochangwa na wananchi na zile zinazotolewa na wadau mbalimbali pamoja na Serikali.

Awali, Katibu Tawala wa Wilaya ya Makete Bi. Grace Mgeni ameiasa jamii kuwatimizia mahitaji wanafunzi (watoto) ya shuleni ili waweze kusoma vizuri na kupata matokeo mazuri hasa wanafunzi wa kike ili kuondokana na vishawishi vinavyopelekea mimba za utotoni.

#MaketeMojaTuijengePamoja