MKUU WA WILAYA YA MAKETE APONGEZA JUHUDI ZA UPAMBANAJI WA UDUMAVU WILAYA YA MAKETE

Tarehe Iliyowekwa: April 24th, 2025

Mkuu wa Wilaya ya Makete, Mhe. Kissa Gwakisa Kasongwa, amewataka Watendaji wa Kata kuwa wabunifu katika kuhakikisha kuwa wanapambana na udumavu kwenye maeneo yao wanayoyasimamia.

Mhe. Kasongwa, amesema hayo leo Aprili 24,2025, wakati wa kikao cha Utekelezaji wa Viashiria vya Lishe ngazi ya Kata, katika Robo ya Tatu kwa mwaka wa fedha wa 2024/2025, ambacho kimefanyika katika Ukumbi wa Bomani uliopo katika ofisi za Halmashauri ya Wilaya ya Makete.

“Kila mtu akaongeze ubunifu wake katika kutekeleza Afua za Lishe, kwenye maeneo yenu, sambamba na kushirikiana na wadau mbalimbali ili kuongeza Virutubisho kwenye vyakula kama vile unga” Amesema Mhe. Kissa.

Kwa upande wake, Kaimu Mkurugenzi Mtendaji wa Halmashauri ya Wilaya ya Makete, Dkt. Ligobert Kalisa, amesema kuwa, mpango ni kuhakikisha kuwa kila kijiji kinapata elimu ya umuhimu wa Lishe Bora kwa watoto wadogo, na kwamba kumekuwa na matukio mbalimbali ya ufundishaji wa vitendo katika upikaji wa vyakula vyenye lishe kwa watoto.

Naye, Mkuu wa Idara ya Utumishi wa Halmashauri ya Wilaya ya Makete, Ndg, Humphrey Mushi, ameshauri Idara ya Kilimo na Mifugo, kuja na namna bora ya uboreshaji wa ardhi na matumizi bora ya pembejeo ili kupata mazao yenye ubora kutokana na kuwepo kwa mvua nyingi ndani ya Wilaya ya Makete.

Sambamba na hayo, Afisa Lishe wa Halmashauri ya Wilaya ya Makete, Bi. Jackline Nannauka, akihitimisha wasilisho lake kwa mkuu wa Wilaya ya Makete, ameshukuru kwa ushirikiano mkubwa anaoupata kutoka kwa viongozi  kuanzia ofisi ya Mkuu wa Wilaya hadi kwa Mkurugenzi Mtendaji wa Halmashauri ya Wilaya ya Makete.