DC SWEDA AWATAKA WASIMAMIZI WA UCHAGUZI KUSIMAMIA KANUNI NA SHERIA ZA UCHAGUZI WA SERIKALI ZA MITAA

Tarehe Iliyowekwa: September 30th, 2024

Mkuu wa Wilaya ya Makete, Mhe. Juma S. Sweda, amewataka wasimamizi wa uchaguzi kusimamia kanuni na sheria za uchaguzi ili kuepukana na migogoro isiyo ya lazima katika maeneo ambayo watapangiwa kusimamia uchaguzi huo.

Mhe. Sweda, amesema hayo leo Septemba 30,2026, wakati akiongea na wasimamizi hao kwenye ukumbi wa Bomani, uliopo makao makuu ya Halmashauri ya Wilaya ya Makete.

“Zieleweni kanuni na sheria za uchaguzi ili mkawe wasimamizi bora katika maeneo yenu, uchaguzi unautaratibu wake, hivyo fuateni miiko ya utumishi wa umma pamoja kiapo chenu” Alisema Sweda.

Aidha, amesema kuwa hakikishe kuwa 4R za Rais wa Jamhuri ya Muungano wa Tanzania, Mhe. Dkt. Samia Suluhu Hassan, zinatumika katika kutekeleza majukumu yenu ya kiuchaguzi, pamoja na kufuata weledi katika majukumu yao.

Ikumbukwe kuwa, Uchaguzi wa serikali za mitaa utafanyika Novemba 27,2024 hivyo wananchi wote wanatakiwa kuandikishwa katika daftari la mkazi ili waweze kupiga kura siku hiyo ya uchaguzi.

Kwa Upande wake, Msimamizi wa Uchaguzi wa Wilaya ya Makete, Ndg.William M. Makufwe, amewataka wasimamizi hao wa Uchaguzi kuhakikisha kuwa wanasoma miongozo na Kanuni za Uchaguzi ipasavyo na kunielewa Ili waweke kutekeleza majukumu yao pasi na shaka.

Nae, Kamanda wa TAKUKURU Wilaya ya Makete, Ndg. Chilomwa Bitulo, amewataka wasimamizi hao wa Uchaguzi kutokuwa kikwazo katika kukamilisha kwa shughuli hiyo ya kiserikali, Kwa kutojihusisha na rushwa ya namna yeyote ile.

Hata hivyo, Taasisi ya Usalama wa Taifa Wilaya ya Makete, imetoa Elimu ya umuhimu wa kutunza siri katika shughuli nzima ya Uchaguzi wa Serikali za Mitaa, ila kutozua taharuki ambayo itazorotesha amani Wilayani humo.