DED MAKETE AKABIDHI VITI MWENDO KWA WANAFUNZI

Tarehe Iliyowekwa: July 9th, 2022

Mkurugenzi Mtendaji Halmashauri ya Wilaya ya Makete Ndg. William Makufwe amekabidhi viti mwendo vinne kwa wanafunzi wenye ulemavu shule ya Msingi Matamba, Lupila na Lupalilo sekondari.

Makufwe amekabidhi viti hivyo vilivyotolewa na Mangreth Matonya Mkurugenzi Elimu maalumu Tanzania kutoka Wizara ya Elimu kwa lengo la kuwasaidia wanafunzi hao kukabiliana na changamoto mbalimbali zinazowakabili kufuatia ulemavu mbalimbali wa viungo vya mwili walionao

Akiwa shule ya Msingi Matamba Kata ya Matamba Mkurugenzi huyo amesema lengo la Serikali ni kuwasaidia wanafunzi hao waweze kutimiza ndoto zao na kuwasihi kuendelea kusoma kwa bidi ili kutimiza ndoto zao kielimu.

Wanafunzi waliokabidhiwa viti hivyo ni Ruth na Eliberth ambao wanaulemavu wa viungo mbalimbali na kushindwa kutembea.

Mwalimu Mkuu wa shule ya Msingi Matamba Meclaudi Mahenge pamoja na kushukuru kutolewa kwa viti hivyo amesema wanafunzi hao wamepata unafuu wa kutembea kwa kutumia viti mwendo hivyo na sasa watajisikia furaha zaidi kwa usaidizi wa viti hivyo.

Wakiwa shule ya Sekondari Lupalilo ambapo mwanafunzi wa kidato cha nne Nesta Sanga na Lupila Sekonda mwanafunzi Kastori Gindo, kila mwanafunzi amekabidhiwa kiti chake na wameshukuru uongozi wa Elimu maalumu kwa kuona changamoto waliyonayo wanafunzi hao na kuwasaidia kwani itawafanya kuwa na mazingira rafiki ya kujisomea na kuhudhuria vipindi vya masomo kwa wakati.

Kwa niaba ya Mkuu wa shule ya sekondari Lupalilo Mwalimu P. Mtewele ameshukuru jitihada za Serikali katika kuweka mazingira rafiki kwa wanafunzi wakiwemo wenye mahitaji maalumu kwa kuwapatia vifaa wezeshi na kujenga miundombinu rafiki kwenye madarasa n ahata bwenini.

Afisa Elimu maalumu Wilaya ya Makete Mwalimu Asnati Singano amebainisha uwepo wa wanafunzi wawili wa kidato cha tano wenye changamoto ya usikivu ambao amesema watapelekwa Njombe kwa ajili ya vipimo ili waweze kuona namna ya kuwasaidia zaidi.