DED MAKETE AWATAKA WATUMISHI WAPYA KUYAISHI MAADILI YA KIUTUMISHI WA UMMA

Tarehe Iliyowekwa: September 2nd, 2025

Mkurugenzi Mtendaji wa Halmashauri ya Wilaya ya Makete, Ndg. Jerry Daimon Mwaga, amewataka watumishi wapya wa Halmashauri hiyo kuhakikisha kuwa wafuata maadili ya kiutumishi pamoja utu katika kutimiza majukumu yao ya kila siku.

Ndg. Mwaga, amesema hayo leo Agosti 02,2025, wakati akizungumza na watumishi wapya ambao wapo kwenye mafunzo ya Utangulizi kabla ya kuanza majukumu ya kiutumishi wa Umma ambayo yanafanyika katika Ukumbi wa Chuo cha Walimu Tandala, kilichopo kata ya Tandala Wilayani Makete.

“Utumishi wa umma unaendana na Maadili ya kikazi pamoja na mavazi yako unayovaa unapokuwa kazini, hivyo kila mmmoja lazima ajue kutofautisha majukumu yake na kikazi na binafsi kwakuwa serikali imekuamini hivyo timiza wajibu wako, pamoja na kujua mipaka yako ya kiutendaji” Alisema Ndg. Mwaga.

Aidha, ameongeza kwa kuwataka watumishi hao kujiandaa mapema na kustaafu kwa kuwekeza sehemu mbalimbali kwakuwa utumishi wa Umma una ukomo wake, ili kuhakikisha kuwa mtumishi huyo hakumbani na changamoto zozote pindi atakapostaafu.

Hata hivyo, amewataka watumishi hao kutosita kufika ofisini endapo watakutana na changamoto zozote katika utekelezaji wa majukumu yao kwakuwa serikali ina namna mbalimbali za utatuzi wa changamoto zake kwa watumishi wa umma.

Sambamba na hayo, kabla ya kukutana na Watumishi hao wapya, Mkurugenzi Mtendaji wa Halmashauri ya Wilaya ya Makete Ndg. Jerry Daimon mwaga, alikutana na kufanya mazungumzo na Watumishi wa Chuo cha Walimu Tandala, ambapo amewasihi kuendelea kuwawatengeneza Walimu bora ambao watakuja kuwa na tija katika kuwafundisha watoto hapo baadae.