DED MAKETE DC AAGIZA KUKAMILIKA HARAKA KWA NYUMBA PACHA YA WATUMISHI KITUO CHA AFYA KIPAGALO

Tarehe Iliyowekwa: September 11th, 2025

Mkurugenzi Mtendaji wa Halmashauri ya Wilaya ya Makete, Ndg. Jerry Daimon Mwaga, leo Septemba 11,2025, amekagua umaliziaji wa Majengo kadhaa katika Kituo cha Afya Cha Kipagalo, ikiwemo Jengo la kuhifadhia Maiti, Upasuaji, pamoja na nyumba pacha ya Watumishi. 

Akizungumza mara baada ya Ukaguzi wa Nyumba pacha ya Watumishi, amemuagiza fundi anayejenga Jengo hilo kukamilisha shughuli mbalimbali zilizobaki ili wiki ijayo wahudumu wa kituo hicho waanze kuitumia Nyumba hiyo, kwakuwa kituo hicho kimeanza kutoa huduma kwa wagonjwa wa nje.

Aidha, Ndg. Mwaga, amekagua Ujenzi wa bweni la Wasichana katika Shule ya Sekondari Tupevilwe, ambapo ameonesha kutoridhishwa na kasi ya ukamilishaji wa Bweni Hilo licha ya kuwepo kwa malighafi zote za Ujenzi.

Ikumbukwe kuwa, Kituo cha Afya cha Kipagalo kimepelekewa Fedha kiasi cha Shilingi milioni 805, (TASAF) ili kukamilisha Mradi huo, ambapo kwa sasa wapo katika hatua ya umaliziaji Kwa baadhi ya majengo, sambamba na Shule ya Sekondari Tupevilwe iliyopo katika ya Bulongwa ambayo ilipewa zaidi ya Shilingi Milioni 480,(SEQUIP) Kwa ajili ya Ujenzi wa Mabweni mawili, vyumba vinne vya madarasa, pamoja na nyumba pacha ya watumishi wa Shule hiyo.