TARI YARIDHIA KUJENGA KITUO CHA UTAFITI WA MBEGU MBORA ZA KILIMO CHA VIAZI MVIRINGO NA TUFAA WILAYANI MAKETE

Tarehe Iliyowekwa: September 10th, 2025

Mkurugenzi Mkuu wa Taasisi ya Utafiti wa Kilimo hapa nchini (TARI), Dkt, Thomas Bwana, leo Septemba 10,2025, akiwa ameongozana na Wataalam mbalimbali kutoka katika taasisi hiyo wamekagua maeneo katika Kijiji cha Ibaga pamoja na Iniho, na kuridhia kuanzisha kituo cha Utafiti wa mbegu za viazi Mviringo pamoja na Tufaa. 

Akizungumza kwa nyakati tofauti mara baada ya ukaguzi wa maeneo hayo, Dkt, Bwana, amesema kuwa hakuna haja ya kuendelea kuchelewa kuanzishwa kwa kituo hicho cha Utafiti wa Mbegu za Kilimo bora, kutokana na umuhimu wake pamoja na uhitaji wa mbegu hizo za wakulima.

“hakuna haja ya kumcheleweshea mafanikio mkulima,mkulima hatakiwi kuwa nasababu ya kujitetea kuwa amekosa mbegu bora za kilimo, au wataalam wa kilimo, hata kama akipata changamoto za uzalishaji tunatakiwa kuwepo ili kuwasaidia kwakuwa ndio jukumu letu”   alisema Dkt. Bwana.

Kwa Upande wake Mkurugenzi Mtendaji wa Halmashauri ya Wilaya ya Makete, Ndg, Jerry Daimon Mwaga, amesema kuwa lengo la halmashauri ni kuhakikisha kuwa wanatafuta fursa mbalimbali za masoko pamoja na kuboresha kilimo kwa wakulima ili waweze kukua kiuchumi.

“Halmashauri imedhamiria kuhakikisha kuwa inaboresha mazingira ya uzalishaji wa mazao ndani ya wilaya ya Makete, ndio maana imekuwa ikitafuta fursa mbalimbali za uboreshaji wa kilimo  kutokana na mchango wao mkubwa katika uchumi wa Makete, hivyo tunaaamini TARI mtachangia kwa sehemu kubwa katika utafiti wa Mbegu bora za viazi Mviringo pamoja na Tufaa” alisema Ndg, Mwaga.

Naye Mkuu wa Idara ya Kilimo, Mifugo na Uvuvi, Ndg. Evance Mdee, amesema kuwa zaidi ya ekari 600 zimetengwa kwa ajili ya Uwekezaji wa Utafiti wa  Mbegu bora za Kilimo cha viazi mviringo katika vijiji vya Malembuli na Ibaga, ikiwa ni pamoja na mpango wa uwekaji wa mifumo ya umwagiliaji ili wakulima hao waweze kulima katika misimu yote ya kilimo.

Ikumbukwe kuwa, Halmashauri ya Wilaya ya Makete, asilimia 90 ya wakazi wake ni wakulima, na kilimo kimekuwa kikichangia kwa sehemu kubwa katika kukuza uchumi wa wananchi, hivyo Halmashauri imepanga kuhakikisha kuwa wakulima wanajengewa mazingira bora ya uzalishaji wa mazao yao pamoja na masoko.