DED MAKUFWE AAGIZA KUCHUKULIWA HATUA ZA KISHERIA WAZAZI WOTE AMBAO WAMESHINDWA KUWAPELEKA WATOTO SHULE

Tarehe Iliyowekwa: January 16th, 2024

Mkurugenzi Mtendaji wa Halmashauri ya Wilaya ya Makete, Ndg. William M. Makufwe leo Januari 16,2024, amekagua Uandikishaji wa wanafunzi, kusikiliza na kutatua kero mbalimbali za wananchi kupitia KAMAKA, katika kata mbili za Isaplano na Kitulo zilizopo Wilayani Makete.

Akiwa katika ziara hiyo, Ndg. William M. Makufwe, amewataka viongozi wote kuanzia ngazi ya Kijiji kuhakikisha kuwa wanasimamia zoezi la kiwabaini wazazi ambao hadi sasa Watoto wao hawajapelekwa Shule kwa mujibu wa sheria, kwakuwa kila mtoto ambaye amekidhi vigezo ana haki ya Kusoma.

"Rais wetu Mhe. Dkt. Samia Suluhu Hassan, amekuwa akitoa Fedha nyingi sana kwaajili ya kuboresha miundombinu ya Elimu hapa Makete, sasa nashangaa kuona baadhi ya wazazi hawataki kuwapeleka watoto Shule, huu ni Ukatili, wachukulieni hatua za kisheria kwakuwa Elimu kwa mtoto ni lazima" Amesema Ndg. Makufwe.

Aidha, Ndg. Makufwe, amewataka watumishi wa Umma, kuhakikisha kuwa wanatatua changamoto ambazo zimekuwa zikiwakumba wananchi, ikiwa ni pamoja na kuwahimiza wanamakete kupambana na Udumavu, kutokana uelewa finyu wa matumizi ya Lishe bora Kwa watoto wenye umri chini ya Miaka 2. 

Naye Afisa Lishe, kutoka Hospitali ya Wilaya ya Makete, Bi. Agnes Columbani, amewataka wanamakete kuzingatia mlo kamili kwa Watoto wao, tangu akiwa tumboni kwa mama, ili kupambana na Udumavu.

"hakikisheni vyakula wanavyotumia watoto wenu vimezingatia makundi yote ya Chakula, kama vile protini, Wanga, madini ya chuma, pamoja kuzingatia upandaji wa miti ya Matunda, pamoja na Bustani za Mbogamboga kwenye Taasisi za Shule " Alisema Bi. Agnes Columbani.

Kwa Upande wake, Afisa Mapato wa Halmashauri ya Wilaya ya Makete, Ndg. Bwire Muyengi, amewataka wakuu wa Taasisi zote za Serikali, kuhakikisha kuwa makusanyo yote kuanzia ngazi ya kijiji yanawekwa Benki, ili kuwe na utaratibu katika utoaji, pamoja na kutumia mfumo katika matumizi yeyote yale.