DED MAKUFWE AKERWA NA MATOKEO KIDATO CHA PILI , SHULE YA SEKONDARI IWAWA , ILIYOPO WILAYANI MAKETE

Tarehe Iliyowekwa: January 19th, 2024

Mkurugenzi Mtendaji wa Halmashauri ya Wilaya ya Makete, Ndg. William M. Makufwe, leo Januari 19/2024, ameonesha kutoridhishwa na baadhi ya watumishi wa Umma, hususani walimu wa Shule ya Sekondari Iwawa, Iliyopo Wilayani Makete, baada ya kutokuwa na matokeo mazuri Kwa kidato cha Pili.

Ndg. William Makufwe, amesema hayo wakati wa kikao kazi na Kamati ya Maendeleo ya Kata, katika Kata ya Iwawa, iliyopo Wilayani Makete, ikiwa ni mwendelezo wa ziara ya siku ya Nne ya kukagua Uandikishaji wa wanafunzi ngazi ya awali, Msingi na Sekondari Kwa Kidato cha kwanza, pamoja na kusikiliza kero za wananchi.

"Kuna kanuni za kuwasimamia walimu pale wanaposhindwa kutimiza majukumu yao pamoja na wanafunzi , haipendezi kuona shule ipo Mjini inaongoza kwa kufelisha hii haileti picha Nzuri, walimu na wazazi shirikianeni vizuri ili hii changamoto isijirudie tena kwasababu ufaulu I a mtoto unaanzia nyumbani" Alisema Ndg. William Makufwe.

Aidha, Ndg. Makufwe amewataka viongozi hao kutoa Elimu ya matumizi sahihi ya Mbolea na sio kuandaa mashamba Kwa kuchoma moto, kwakuwa wamekuwa wakisababaisha hasara kwa wamiliki wa misitu ya kupandwa na Asili.

Sambamba na hayo, Ndg. Makufwe, amewataka viongozi wote kuanzia ngazi ya Kitongoji kuwa mabalozi wazuri wa Serikali iliyopo madarakani kwa kutoa taarifa za utekelezaji wa miradi pamoja na kuwasomea wananchi taarifa ya mapato na matumizi.

Kwa upande wake, Kaimu Afisa Lishe wa Halmashauri ya Wilaya ya Makete Bi. Agnes Columbani, amewataka viongozi kuwa mabalozi wazuri, katika kuhakikisha mtoto anapata Lishe akiwa tangu tumboni mwa mama yake.

"Lishe bora ni maisha ya Mtoto kwa miaka yake yote, hivyo basi akikosewa tangu akiwa tumboni mwa mama yake, basi utakuwa umemharibia maisha yake yote, kwakuwa hatakuwa na uwezo wa kufikiri vizuri" Alisema Bi. Agnes Columbani. 

Ikumbukwe kuwa, Leo Mkurugenzi Mtendaji wa Halmashauri ya Wilaya ya Makete, Ndg. William M. Makufwe amefanya ziara hiyo, katika kata mbili za Lupalilo na Iwawa, ambapo amesikiliza na kutatua kero mbalimbali za wananchi.