DED MWAGA AWATAKA WANANCHI KUSHIRIKI KWENYE MIRADI KIKAMILIFU

Tarehe Iliyowekwa: June 4th, 2025

Mkurugenzi Mtendaji wa Halmashauri ya Wilaya ya Makete Ndg. Jerry Daimon Mwaga, ametoa rai kwa wananchi wa Halmashauri hiyo kuhakikisha kuwa wanashiriki kimamilifu kwenye utekelezaji wa miradi ambayo inatekelezwa katika maeneo yao ili iweze kukamilika kwa wakati.

Ndg. Mwaga, amesema hayo leo Mei 4,2025, wakati akizungumza na wananchi wa Kijiji cha Kitula, kilichopo Kata ya Kipagalo, mara baada ya ukaguzi wa miradi   mbalimbali katika kata hiyo ya Kipagalo, Luwumbu, Bulongwa, Ipelele na Iniho.

“niwaombe sana wananchi wenye miradi kwenye maeneo yenu,shirikianeni vizuri na wasimamizi wa miradi, mafundi pamoja na Serikali kwa ujumla katika kuhakikisha kuwa, miundombinu hiyo inakamilika kwa wakati kutokana na umuhimu wake katika jamii” alisema Ndg. Mwaga.

Aidha, Ndg. Mwaga, amewataka wahandisi wa Halmashauri kutoa ushauri wa kiufundi pamoja na kuitemblea miradi hiyo mara kwa mara ili iwe na ubora unaotakiwa na serikali, ikiwa ni pamoja na kudumu kwa muda mrefu kutokana na umuhimu wake katika ustawi wa kijamii.

Sambamba na hayo, Ndg. Mwaga, amewataka walimu pamoja na watumishi mbalimbali wilayani humo kuhakikisha kuwa miundombinu inayojengwa na serikali inatunzwa sambamba na kuendana na huduma zinazotolewa, kama vile ufaulu wa wanafunzi katika shule mbalimbali ndani ya Halmashauri hiyo ya Wilaya ya Makete.

Katika Upande mwingine, Mkurugenzi mtendaji, ametoa siku 10 kwa watekelezaji wa mradi wa ujenzi wa kituo cha Afya Kipagalo, kuhakikisha kuwa majengo yote ambayo yalianza awali yawe yamekamilika kwa asilimia 100, kutokana na uhitaji wake kwa wakazi wa kata ya Kipagalo na maeneo ya jirani.

Naye, Mwenyekiti wa kijiji cha Kitula, Bi. Jenifer Sanga, akizungumza kwa niaba ya wakazi wa kijiji hicho, amemshukuru Rais wa Jamhuri ya Muungano wa Tanzania, Mhe. Dkt, Samia Suluhu Hassan, kwa kuwapelekea fedha Zaidi ya shilingi milioni 100, ili kuboresha miundombinu ya elimu na afya ndani ya kata hiyo.

Ikumbukwe kuwa, MkurugenzI Mtendaji wa halmashauri ya Wilaya ya Makete, Ndg. Jerry Daimon Mwaga, leo ametembelea na kukagua miradi katika kata za Kipagalo, Luwumbu, Inihi, Ipelele, Bulongwa na Iniho, ambapo hapo kesho Mei 5,2025, akiwa pamoja na wataalam wa Halmashauri ataendelea na ziara ya ukaguzi wa miradi katika kata za Kitulo, Matamba, Isaplano, Mlondwe na Kinyika.