HAKUNA MANUNUZI YA SERIKALI YATAKAYOFANYIKA NJE YA MFUMO WA NeST, NDG. MATHIAS MBAFU

Tarehe Iliyowekwa: January 10th, 2024

Mkuu wa kitengo cha Manunuzi na Ugazi wa Halmashauri ya Wilaya ya Makete, Ndg. Mathias Mbafu, amewataka wakuu wa idara, vitengo pamoja na wasimamizi wa taasisi zote za serikali ikiwemo elimu, kuhakikisha kuwa wanafanya manunuzi kupitia mfumo mpya wa Ununuzi wa Umma wa Kielektroniki ujulikanao kama NeST ili kutovunja sheriza manunuzi.

Ndg. Mathias Mbafu, amesema hayo leo Januari 10, 2024, wakati wa kuwajengea uwezo wa namna na kufanya manunuzi kupitia NeST, Wakuu wa Shule za Sekondari, za kidato cha tano na Sita, zilizopo katika Halmashauri ya Wilaya ya Makete.“hakuna manunuzi yoyote yatakayofanyika nje ya mfumo, uliowekwa na serikali, hivyo basi kila mhusika ahahakishe kuwa anaujua mfumo huu vizuri ili asikumbane na rungu la sheria” Alisema Ndg. Mathias Mbafu.

Naye mmoja wa wanufaika wa mafunzo hayo ya manunuzi kupitia NeST, Mkuu wa Shule ya Sekondari Lupila, Mwl. Mwabukasa John Ngwale, amesema kuwa mfumo huo utakuwa mkombozi katika kuokoa gharama za bidhaa, kutokana na kuwepo na ushindani katika upatikanaji wa mzabuni.

Ikumbukwe kuwa Mamlaka ya Udhibiti wa Ununuzi wa Umma, PPRA, imeanzisha mfumo mpya wa Manunuzi ya Umma, ujulikanao kama NeST, baada ya ule wa zamani TANePS kutokuwa rafiki katika matumizi.