HALMASHAURI YA WILAYA YA MAKETE YAKABIDHI BATI 455, SHULE YA SEKONDARI IPELELE

Tarehe Iliyowekwa: January 27th, 2024

Halamshauri ya Wilaya ya Makete, leo Januri 27,2024,  imekabidhi jumla ya bati 455 katika shule ya Sekondari Ipelele iliyopo Wilaya ya Makete Mkoani Njombe kwa ajili ya ukarabati wa vyumba 10 vya madarasa na nyumba 3 za walimu ambazo ziliezuliwa na upepo wiki iliyopita.

Akizungumza wakati wa kukabidhi bati hizo, Kaimu Mkurugenzi Mtendaji wa Halmashauri ya Wilaya ya Makete, Bi. Jackline Mrosso amesema bati hizo zimenunuliwa ili kuhakikisha kuwa watoto wanarudi shule Jumatatu ya tarehe 29 Januari 2024 kuendelea na masomo kwakuwa tangu litokee janga hilo watoto walilazimika kurudishwa nyumbani.

Kwa upande wake Mtendaji wa kata ya Ipelele Bi. Faith Myoka ameishukuru Halmashauri ya Wilaya ya Makete kwa kuwaletea bati hizo huku na kuwataka wazazi wahakikushe kuwa watoto wanarejea shule hapo kesho tarehe 29/1/2024.

Nao baadhi ya Wananchi wa kata hiyo akiwemo Bw. Niko Sanga na Bw. Samora Kibholile wamemshukuru Mkuu wa Wilaya ya Makete Mhe. Juma Sweda na Mkurugenzi Mtendaji Halmashauri ya Wilaya ya Makete Ndg. Wiliam Makufwe kwa kuwafariji na kuwatia moyo baada ya kupata, maafa, ikiwa ni pamoja na kuwapongeza wananchi wenzao kwa kushirikiana katika kipindi hicho kigumu, kwani wamejitokeza katika kuendeleza juhudi za serikali za kuhakikisha Watoto wanarejea Shule haraka iwezekanavyo.

Ikumbukwe kuwa, Wilaya ya Makete hivi karibuni imekumbwa na uwepo wa mvua nyingi iliyoambatana na upepo mkali na kusababisha nyumba, taasisi za dini na vyumba vya madarasa kuezuliwa na baadhi kubomoka.