HALMASHAURI YA WILAYA YA MAKETE YAMFUTA KAZI NDG. KELVIN NGAILO KWA WIZI WA MAPATO YA SERIKALI

Tarehe Iliyowekwa: November 17th, 2023

Halmashauri ya Wilaya ya Makete, imemfuta Kazi Ndg. Kelvin Ngailo, mtendaji wa Kijiji daraja la (II) katika kijiji cha Ikuwo, kilichopo katika kata ya Ikuwo, baada ya kuchezea mfumo wa Mapato kupitia POS ya Halmashauri na kuiba kiasi cha shilingi milioni 4,261,500/=.

Maamuzi hayo, yamefanyika leo Novemba 17, 2023, baada ya Kikao Cha Baraza la Madiwani la Halmashauri ya Wilaya ya Makete, kuridhia kufukuzwa kwake, baada ya kutenda kosa hilo kinyume cha Sheria za nchi.

Sambamba na hayo, Ndg. Kelvin Ngailo, baada ya kufanya ubadhirifu huo wa Fedha za Umma, aliamriwa Kulipa kiasi chote cha Fedha ambacho alijipatia kinyume na utaratibu na kuipelekea Halmashauri kupata hasara hiyo ya Shilingi milioni 4, 261,500/=. ikiwa ni asilimia 10 ya makusanyo ya Mapato, na yeye kubakiwa na asilimia 90 ya Mapato yote yakiyokusanywa.

Hata hivyo,Halmashauri ya Wilaya ya Makete, iliendelea na hatua za kinidhamu na suala lake limehitimishwa leo Novemba 17, 2023, katika kikao cha baraza la madiwani, ambapo wamefikia maamuzi hayo kumfuta kazi Ndg. Kelvin Ngailo.

Kwa Upande wake, Mkurugenzi Mtendaji wa Halmashauri ya Wilaya ya Makete, Ndg. William M. Makufwe, amesema kuwa hatakuwa tayari kuwavumilia watumishi wote wa Halmashauri hiyo, ambao watahusika na ubadhirifu wa aina yeyote ile katika ukusanyaji wa Mapato ya Serikali, hivyo kila mmoja awajibike Kwa nafasi yake.

Imeandaliwa na:

Kitengo cha Mawasiliano Serikalini,

Halmashauri ya Wilaya ya Makete