HALMASHAURI YA WILAYA YA MAKETE YATOA MKOPO WA SHILINGI MILIONI 401,402,000.00 KWA VIKUNDI 25.

Tarehe Iliyowekwa: July 4th, 2025

Halmashauri ya Wilaya ya Makete, leo Julai 4,2025, imetoa Mkopo kiasi cha Shilingi Milioni 401,402,000.00 kwenye vikundi 25, vya Wanawake, Vijana na Watu wenye Ulememavu, ikiwa ni awamu ya tatu ya Utoaji Mikopo ya Asilimia 10, kwa vikundi vya Ujasiriamali.

Akizungumza katika hafla ya kukabidhi hundi kwa Vikundi hivyo, Mkuu wa Wilaya ya Makete, Mhe. Kissa Gwakisa Kasongwa, amewataka wanufaika wa mkopo huo, kuzitumia fedha hizo kwa malengo waliyoyapanga ili ziweze kuwasaidia na kuwainua kiuchumi.

"Lengo la serikali kutoa mikopo hiI ni kuwasaidia wananchi kujikwamua kiuchumi, kwahiyo hizi fedha mlizopewa zitumike vizuri na kuweni waaminifu katika kuzirejesha kwa wakati ili ziweze kuwanufaisha na watu wengine" Alisema Mhe. Gwakisa.

Naye, Afisa Maendeleo ya Jamii wa Halmashauri ya Wilaya ya Makete, Bi.Jacklina Thomas Mrosso, amewatata waliopata mkopo huo kutumia kwenye miradi iliyopo kwenye mikataba yao na kama kunamtu atabadilisha mradi anapaswa kuwasiliana na Ofisi ya Maendeleo ya Jamii, na kuwataka kuzirejesha fedha hizo kwa wakati kama mkataba wao unavyoelekeza.

Aidha, Bi. Mrosso, amezitaja kata zilizonufaika na mkopo huo kuwa ni Lupalilo, Tandala, Ukwama, Kitulo, Bulongwa,Itundu,Ikuwo,Iwawa pamoja na Mlondwe.

Kwa Upande wake, Katibu wa Vijana wa Chama Cha mapinduzi Wilaya ya Makete, Ndg. Kapolo, ameishukuru Serikali kwa kuendelea kutoa mikopo hiyo na kuwasihi wanufaika wa mkopo huo kujiepusha na matumizi mabaya ya fedha hizo badala yake zitumike katka malengo mahususi waliyoyapanga.

Akizungumza kwa niaba ya Wamufaika wa Mkopo huo, Ndg. Hongera Mahenge, ameishukuru serikali kwa kuwapatia mikopo hiyo na kuwasihi waliopata mkopo huo kuzingatia matakwa ya mkataba na kuzitumia fedha hizo kwa malengo mahususi ili ziwanufaishe katka shughuli zao.