HATIMILIKI ZA KIMILA

Tarehe Iliyowekwa: April 25th, 2022

Mkuu wa Wilaya ya Makete Mhe. Juma Sweda amewataka wananchi wanaomiliki hatimiliki za ardhi kutumia kupata fedha badala ya kukaa nazo kama mapambo.

Akizungumza na Viongozi wa makujwaa ya ardhi ya Vijiji kutoka Kata ya Ipepo na Lupalilo ambapo Mradi wa umiliki ardhi awamu ya pili unatekelezwa chini ya usimamizi wa mradi wa MIICO amewasihi wananchi kuona hiyo kama fursa ya kuwaingizia kipato.

Mh. Sweda amesema ardhi yenye hatimiliki wakati wowote inaweza kuwaingizia kipato kwa kupata mkopo kwente Taasisi mbalimbali za kifedha.

Akiwa kwenye kikao cha wadau wa masuala ya Ardhi Wilaya ya Makete na Viongozi wa Majukwaa ya ardhi, amewashukuru Viongozi wa mradi wa MIICO na mashirika mengine kwa kuendelea kutoa Elimu ya umuhimu wa kumiliki hati za ardhi kwa wananchi Wilayani Makete.

Gloria Mdindile Afisa Mradi Shirika la MIICO amesema katika utoaji wa elimu kuhusu umiliki wa ardhi wananchi Wilayani Makete wamepata uelewa kuhusu umuhimu wa Hati hususani za kimila.

Gloria ameongeza kuwa Shirika hilo limejikita kutoa Elimu katika mikoa mbalimbali ikiwemo Mkoa wa Njombe Halmashauri ya Wilaya ya Makete na mradi huo unatekelezwa kwenye Kata mbili za Wilaya ya Makete ambapo umekuwa na mafanikio makubwa tangu ulipoanzishwa.

Ibrahim Butala Afisa Ardhi Wilaya ya Makete amesema Halmashauri inampango wa kuendelea kupima ardhi katika vijiji mbalimbali vya Wilaya ili kusaidia wananchi waweze kumiliki hati.

Pia amesema Halmashauri imepanga kuanza upimaji wa ardhi katika Kata mbalimbali ambazo hazijafikiwa na zoezi la upimaji wa ardhi kwa gharama nafuu ili kusogeza zaidi huduma kwa wananchi.