JUKWAA LA USTAWI WA MTOTO WILAYANI MAKETE LAGAWA VIFAA VYA SHULE KWA WATOTO WENYE UHITAJI

Tarehe Iliyowekwa: January 30th, 2024

Jukwaa la Ustawi wa Mtoto la Wilaya ya Makete, leo Januari 30, 2024, limetembelea kata ya Ipepo kwa ajili ya kutoa elimu ya malezi kwa wototo na kuwakabidhi vifaa vya shule wanafunzi wanaoishi katika mazingira magumu.

Akikabidhi vifaa hivyo mbele ya Kamati ya Maendeleo ya Kata (KAMAKA) ya Kata ya Ipepo, Mkurugenzi Mtendaji halmashauri ya Wilaya ya Makete ambaye pia ni Mwenyekiti wa Jukwaa hilo, amesema vifaa hivyo vimetokana na michango ya wadau mbalimbali wa ndani na nje ya Makete ili kuwashika mkono watoto wanaoishi katika mazingira magumu.

Aidha Ndg. Makufwe ameongeza kuwa, ukimnyima mtoto elimu leo, utakuwa umemfanyia Ukatili kwa kumtengezea mazingira magumu hapo baadae, na kumfanya kuwa tegemezi katika maisha yake yote, sambamba na kuharibu nguvu kazi ya Taifa la Tanzania.

Sambamba na hayo, Makufwe amewataka wanafunzi hao kusoma kwa bidii na kutumia vifaa hivyo walivyokabidhiwa, katika kuboresha taaluma yao kwa kufaulu vizuri darasani, kwani serikali ya awamu ya sita imeboresha na inaendelea kuboresha miundombinu ya shule Wilayani Makete.

Kwa Upande wake, Mwalimu mkuu wa Shule ya Msingi, Maliwa, Ndg. Thomas Mwamalekela, amemshukuru Mkurugenzi Mtendaji wa Halmashauri ya Wilaya ya Makete Ndg. William Makufwe, kwa kufanya jambo hilo, ambalo linawafundisha na kuwakumbusha kuwasaidia watu wenye mahitaji muhimu, hasa watoto.

Akizungumza kwa niaba ya wanafunzi waliopata mahitaji hayo, Mtoto Ostela Sanga ameshukuru na kuahidi kuendelea kufanya vizuri katika masomo na kwamba vifaa hivyo vimeleta hamasa zaidi ya kusoma kwa bidii.

Ikumbukwe kuwa, Jukwaa la Ustawi wa Mtoto linaongozwa na Mkurugenzi Mtendaji halmashauri ya Wilaya ya Makete, ambapo leo limezindua zoezi la kutoa elimu ya malezi na kugawa vifaa vya shule katika kata ya Ipepo ambapo na kwamba zoezi hilo ni endelevu katika Wilaya yote ya Makete.