KABLA YA KRISIMASI TUPEVILWE SEKONDARI IWE IMEKAMILIKA - DED MAKUFWE

Tarehe Iliyowekwa: December 5th, 2023

Mkurugenzi Mtendaji wa Halmashauri ya Wilaya ya Makete, Ndg. William M. Makufwe, amewataka wasimamizi wa Ujenzi wa Shule mpya ya Sekondari Tupevilwe, inayojengwa kata ya Bulongwa, kuhakikisha kuwa ujenzi huo unakamilika kabla ya Christmas ili maandalizi ya kuwapokea kidato cha kwanza yaanze mapema.

Ndg. Makufwe amesema hayo leo Desemba 5, 2023, wakati akizungumza na wasimamizi wa Ujenzi huo ambao ni , Mkuu wa Shule ya Sekondari Usililo Mwl. Daniel Lukas Kamwela, na Mtendaji kata ya Bulongwa Ndg. Majuto Lunyamiso Mbwilo, mara baada ya kufanya ukaguzi wa Ujenzi wa Shule hiyo mpya ya Sekondari.

"Tarehe 8, mwenzi wa kwanza sio mbali, hivyo sitegemei kuona ucheleweshwaji wa mradi huu mkubwa wa ujenzi wa Shule hii ya Sekondari Tupevilwe haukamiliki kwa wakati, nitakuja Alhamis ijayo kuona kama mmepiga hatua, lengo ni kuhakikisha kuwa vijana wetu wanasoma katika mazingira bora " Alisema Ndg. Makufwe.

Naye Afisa Maendeleo ya Jamii wa Halmashauri ya Wilaya ya Makete, Bi. Jackline Mrosso, amewataka kuweka ulinzi mkali wa vifaa vya ujenzi, ikiwa ni pamoja na kuwasimamia mafundi kikamilifu ili waweze kukamilisha majukumu yao kwa wakati, kutokana na umuhimu wa mradi huo.

Ikumbukwe kuwa, Shule ya Sekondari Tupevilwe, inayojengwa katika Kata ya Bulongwa, Wilayani Makete, kupitia Fedha za SEQUIP awamu ya Pili, ambapo kiasi cha shilingi milioni 583,180,023, kitatumika kukamilisha ujenzi wa Shule hiyo ambayo itakuwa mkombozi Kwa wakazi wa Kata hiyo.

Hata hivyo, Mkurugenzi Mtendaji wa Halmashauri ya Wilaya ya Makete, Ndg. William M. Makufwe, kabla ya kutembelea ujenzi wa Shule hiyo , alifika katika Kituo Cha Afya Bulongwa, ambapo ameagiza kituo hicho kianze kufanya kazi wiki ijayo, baada ya kuonekana kukamilika kwa asilimia 95.

Imeandaliwa na:

Kitengo cha Mawasiliano Serikalini,

Halmashauri ya Wilaya ya Makete.