KAMATI YA BUNGE YA KUDUMU YA NISHATI NA MADINI YAFANYA ZIARA YA UKAGUZI WA MRADI WA UMEME WA REA WILAYANI MAKETE

Tarehe Iliyowekwa: March 17th, 2025

Kamati ya Kudumu ya Bunge ya Nishati na Madini, ikiongozwa na Mwenyekiti wake, Mhe. Dkt. David Mathayo David, akiambatana na Naibu Waziri wa Nishati, Mhe. Judith Kapinga, pamoja na Menejimenti ya Wakala wa Nishati Vijijini (REA) na Shirika la Umeme Tanzania (TANESCO), leo Machi 17, 2025, imeendelea na ziara yake mkoani Njombe kwa kukagua utekelezaji wa miradi ya umeme katika Kijiji cha Mang’oto, Kata ya Mang’oto Wilayani Makete.

Akizungumza mbele ya Wakazi wa Kijiji cha Mang’oto, Mwenyekiti wa Kamati, Mhe. Dkt. David Mathayo David, amepongeza REA kwa kazi kubwa wanayoifanya katika kusambaza umeme vijijini, huku akitoa wito kwa mkandarasi kuongeza kasi ya utekelezaji wa mradi ili kuhakikisha maeneo yote yaliyopangwa yanafikiwa kwa wakati.

Naye, Naibu waziri wa Nishati, Mhe. Judith Salvio Kapinga, amewataka wakazi wa Wilaya ya Makete, kuendelea kuiamini Serikali ya Jamhuri ya Muungano wa Tanzania, inayoongozwa na Rais Dkt. Samia Suluhu Hassan, kutokana na kuwa na mafanikio makubwa katika utekelezaji mkubwa wa Miradi yenye tija kwa wananchi hasa usambazaji wa Umeme wa vijiji kupitia REA.

 “Rais Dkt. Samia Suluhu Hassan, amefanya kazi kubwa ya kuhakikisha kila kijiji kila kitongoji kinapata umeme, hapa wilaya ya Makete kimebaki kijiji kimoja cha Kigulu, ambapo tayari Suma JKT wanaenda kufanya kazi ya kuhakikisha kuwa umeme unapatikana katika kijijji hicho, hivyo tuendelee kumuunga mkono Rais wetu ili kazi hizi ziweze kukamilika na wananchi waweze kupata huduma bora”, alisema Mhe. Judith Kapinga.  

Kwa Upande wake, Mjumbe wa Kamati ya Nishati na Madini, akiwemo Mbunge wa Jimbo la Busanda, Mhandisi Tumaini Magesa, amesema kuwa changamoto zote ambazo wananchi wamezisema mbele ya kamati hiyo, zitaenda kufanyiwa kazi kwakuwa serikali inyaoongozwa na Rais Dkt. Samia Suluhu Hassan ni sikivu na inawajali wananchi wake kwa kiasi kikubwa.  

Naye Mkurugenzi wa REA, Mhandisi Jones Olotu, amesema kuwa, Serikali imejipanga kuongeza kasi ya usambazaji wa umeme vijijini, ambapo katika siku za hivi karibuni wanatarajia kutangaza tenda nyingine ili kuongeza nguvu katika utekelezaji wa miradi hiyo hapa nchini.

Pia, Mwenyekiti wa Chama cha Mapinduzi, Ndg. Clemence Mwawite Ngajilo, amemshukuru Rais wa Jamhuri ya Muungano wa Tanzania kwa kuendelea kuinyanyua Wilaya ya Makete kiuchumi, pamoja na watendaji wa Serikali ambao wamekuwa wasikivu kwa kufanya kazi kwa weledi mkubwa ili kuwaletea maendeleo.

Hata hivyo, Mkazi wa Mang'oto, Bw. Daniel Mbilinyi, ameishukuru serikali ya Jamhuri ya Muungano wa Tanzania kwa kuwaletea Umeme, kwakuwa umekuwa na tija kubwa kwa kuleta mabadiliko makubwa katika maisha yao, hususan katika shughuli za uzalishaji na biashara.