KAMATI YA FEDHA MIPANGO NA UTAWALA YAKAGUA MIRADI YA MAENDELEO HALMASHAURI YA WILAYA YA MAKETE

Tarehe Iliyowekwa: February 11th, 2025

Kamati ya Fedha, Mipango na Utawala ya Halmashauri ya Wilaya ya Makete leo Februari 11,2025, imehitimisha ziara ya ukaguzi wa miradi ya Maendeleo katika Halmashauri hiyo, ikiwa ni siku ya pili tangu kuanza kwa ziara hiyo hapo jana Februari 10,2025. 

Akizungumza mara baada ya Ukaguzi huo, Mwenyekiti wa Kamati hiyo, ambaye ni Mwenyekiti wa Halmashauri ya Wilaya ya Makete, na Diwani wa Kata ya Iniho, Mhe. Christopher Yonam Fungo, amesema kuwa, ziara hiyo imekuwa na tija katika kufahamu utekelezaji wa miradi pamoja na kujua changamoto mbalimbali ambazo zimekuwa zikiwakumba wasimamizi wa miradi  pamoja na wajenzi.

Sambamna na hayo, Mhe. Fungo, amewataka wananchi na wasimamizi wa miradi hiyo kukamilisha miradi hiyo kwa wakati na kutumia fedha za miradi hiyo kwenye jukumu lililokusudiwa ili iweze kuanza kutumika na jamii kutokana na umuhimu wake kwa wakazi wa maeneo ya Halmashauri ya Wilaya ya Makete.

Naye, Makamu Mwenyekiti wa Halmashauri ya Wilaya ya Makete, Mhe. Hawa Kader, amesisitiza usafi kwenye miundombinu inayaojengwa kwenye maeneo yao hasa upande wa Elimu na Afya, kutokana na umuhimu wake kwa jamii.

Kwa Upande wake, Mjumbe wa Kamati ya Fedha, Mipango na Utawala, ambaye pia Diwani wa Kata ya Lupalilo, Mhe. Imani Mahenge, akiwa katika ziara hiyo, amewataka wananchi kutoa ushirikiano kwa viongozi wa serikali ili miradi hiyo ikamilike kwa haraka kutokana na uhitaji wake hususani kwenye utoaji wa huduma za Afya.

Pia, Mkurugenzi Mtendaji wa Halmashari ya Wilaya ya Makete, Ndg. Jerry Daimon Mwaga, amesema kuwa, wao kama watendaji wa serikali wamepokea ushauri wa kamati hiyo, na kwamba watahakikisha kuwa unafuatwa ipasavyo ili miradi hiyo iwe na tija kwa wananchi.

Ikumbukwe kuwa, Kamati ya Fedha, Mipango na Utawala, imekagua na Kutembelea Miradi 8 katika kata Saba ambazo ni Lupalilo, Tandala, Mbalatse, Lupila, Bulongwa, Kipagalo na Luwumbu, yenye thamani zaidi ya shilingi bilioni 3,018,879,296, pamoja na vikundi viwili vya Wanawake wanufaika na mikopo ya silimia 10 ambavyo vimekopeshwa kiasi cha shilingi  milioni 20,507,400.00.