KAMATI YA FEDHA YAPONGEZA UJENZI KITUO CHA AFYA LUPALILO

Tarehe Iliyowekwa: August 16th, 2022

Kamati ya fedha Wilaya ya Makete ikiongozwa na Makamu Mwenyekiti wa Halmashauri Mh. Hawa Kader ikiwa katika ziara ya ukaguzi wa miradi mbalimbali Wilayani Makete imeipongeza kamati ya ujenzi Kituo cha Afya Lupalilo kwa usimamizi mzuri wa Kituo hicho.

Viongozi hao wametoa pongezi hizo wakiwa katika ukaguzi huo pamoja na Mkurugenzi Mtendaji Halmashauri ya Wilaya ya Makete ndg. William Makufwe na wakuu wa idara wametembelea ujenzi wa majengo mbalimbali ikiwemo jengo la uzazi, upasuaji na majengo mengine kwa kutumia fedha za awamu ya pili zilizotolewa na Serikali kiasi cha shilingi milioni 250.

Mkurugenzi wa Halmashauri (W) Makete ndg. William Makufwe amesema kasi ya ujenzi katika kituo hicho cha Afya Lupalilo inaridhisha ukilinganisha na maeneo mengine kama Bulongwa ambako Serikali ilitoa fedha kwa wakati mmoja lakini kasi ya ujenzi imetofautiana.

“Kwa kweli kamati zote zinazosimamia ujenzi hapa Lupalilo zinafanya kazi vizuri sana, hapa walipata fedha pamoja na wale wa Bulongwa lakini hawa wako vizuri katika usimamizi na ufuatiliaji lakini wenzao Bulongwa bado wapo kwenye msingi”

Akieleza kuhusu ujenzi huo Mkuu wa idara ya ujenzi ndg. Emily Maganga amesema mradi huo kwa sasa umefikia hatua ya lenta na unaweza kukamilika mwisho wa mwezi huu.

Kamati hiyo ikiongozwa na Makamu mwenyekiti wa Halmashauri Mhe. Hawa Kader wamepongeza uongozi wa Kata ya Lupalilo, kamati za ujenzi na Ofisi ya Mkurugenzi kwa usimamizi wa karibu katika mradi huo huku wakieleza kuridhishwa na kasi ya ujenzi wa kituo hicho.

Kituo cha Afya Lupalilo awali kilipokea fedha kiasi cha shilingi milioni 250 na sasa Serikali imeongeza fedha Milioni 250 na kufikia jumla ya Milioni 500 kwa ajili ya ujenzi wa kituo cha kisasa kitakachohudumia wananchi wa vijiji vitano ambavyo ni Lupalilo, Mago, Ilevelo, Kisinga na Ugabwa.