KAMATI YA SIASA (CCM) MKOA WA NJOMBE YAAGIZA KUKAMILIKA MIRADI KWA WAKATI

Tarehe Iliyowekwa: October 11th, 2023

Kamati ya Siasa Mkoa wa Njombe, ikiongozwa na Mwenyekiti wa Chama Cha Mapinduzi Mkoa wa Njombe (MB), Mhe. Deo Sanga, imefanya majumuisho ya ziara ya kamati hiyo, ambayo ilifanyika katika Halmashauri zote za Mkoa wa Njombe ili kutembelea na kukagua utekelezaji wa Ilani ya Uchaguzi kwa mwaka wa 2020-2025.

Akitoa majumuisho ya ziara hiyo, Mwenyekiti wa CCM Mkoa wa Njombe, Mhe. Deo Sanga, amesema wamekutana na changamoto ambazo, watendaji wa Serikali kupitia Idara na Vitengo, wahakikishe wanakamilisha changamoto zote ambazo wamezibaini.

"Tumegundua kuwepo kwa changamoto nyingi sana katika sekta ya Elimu hususani ujenzi wa maboma viporo ya Madarasa, ikiwa ni pamoja na sekta ya Afya, ambapo vituo vya Afya na Zahanati hazijakamilika, hivyo Serikali kupitia Halmashauri zote zikamilishe kwa haraka maboma hayo ili wananchi waweze kuhudumiwa kiufasaha"

Kwa upande wake Mkuu wa Mkoa wa Njombe Mhe. Antony Mtaka amewataka wale wote wanaotakiwa kutimiza wajibu wao wahakikishe wanawajibika ipasavyo ili Serikali iweze kukamilisha miradi yake kwa wakati.

"Hakikisheni mnatimiza wajibu wenu kuanzia ngazi zote ikiwa ni pamoja na kutembelea Miradi ambayo ipo katika maeneo yenu, sio kuishia kujadiliana mihtasari kwenye vikao vyenu vya Halamshauri"

Naye Waziri wa Katiba na Sheria Mhe. Dkt. Pindi Chana amewataka watumishi wote wa Serikali kutimiza wajibu wao kikamilifu Ili kumsaidia Rais wa Jamhuri ya Muungano wa Tanzania Mhe. Dkt. Samia Suluhu Hassan, kutekeleza ilani ya Chama Cha Mapinduzi (CCM).

Ikumbukwe kuwa kikao kazi hicho kimehusisha Wakuu wa Wilaya, Makatibu Tawala Wilaya, Kamati ya Usalama ya Wilaya, Wakurugenzi watendaji pamoja na CMT zao, pamoja na Wasimamizi wa Taasisi mbalimbali Serikali ngazi ya Wilaya.

Imeandaliwa na:
Kitengo Cha Habari na Mawasiliano Serikalini.
Halmashauri ya Wilaya ya Makete.